लमजुङ — नेकपा (एमाले) उपाध्यक्ष पृथ्वी सुब्बा गुरुङ उम्मेदवार मनोनयन गरेपछि मंगलबार श्रीमती कुमारीमुनी गुरुङसहित ग्रामीण पर्यटकीय गाउँले चर्चा कमाएको घलेगाउँ पुगे ।

शान्ति पुनर्स्थापनापछि बनेको २०६४ को अन्तरिम सरकारमा संस्कृति, पर्यटन तथा नागरिक उड्ड्यनमन्त्री हुँदा उनको पहलमा घलेगाउँ दक्षिण एसियाको नमुना गाउँ (सार्क भिलेज) घोषणा गरिएको थियो ।

क्व्होलासोथार गाउँपालिका-३ मा पर्ने यो गाउँ पृथ्वी सुब्बाको छिमेकी गाउँ हो । वडा नं. ९ गिलुङ टक्सारका पृथ्वी सुब्बाले बुधबार बिहान सात जना कन्यालाई दही र चामल मोलेर बनाइएको अक्षता (टीका)का साथै सयपत्री फूलको थुंगा लगाइदिएर ढोग गरे र चुनावी अभियान सुरु भएको घोषणा गरे । घलेगाउँलाई प्रेमबहादुर घलेको नेतृत्वले थप चिनायो । घले प्रतिनिधि सभा सदस्यका लागि नेकपा (एमाले) का तर्फबाट समानुपातिक उम्मेदवार हुन् ।

अनौपचारिक रूपमा सुरु भएको अभियानका क्रममा वरपर गाउँका स्थानीयसमेत सहभागी थिए । उनलाई घलेगाउँका आमाहरूले रुबा (मन्त्रेको धागो) लगाएर शुभकामना दिएका थिए । ‘म ढुंगा खोज्दै आएको, तपाईंहरू देउता मिल्यो । प्रेम घलेलाई भेट्न आएको, तपाईंहरूसँग भेट भयो,’ उनले भने, ‘मेरो आजदेखि चुनावी अभियान सुरु भयो ।’ उनले बिहानै तिजे उत्तरकन्या देवीको दर्शन समेत गरेको उल्लेख गरे । उनका अनुसार यो यस क्षेत्रमा ठूलो देवीको रूपमा चिनिन्छ । त्यतिमात्र नभएर गुरुङ गुरुङ प्ये (बेद) का श्रृष्टिकर्ता छिँला क्रोइँ र गुरुङको अन्तिम राजा क्लाल्बोरोजा क्लेको शालिकमा समेत पुगे ।

‘मैले जन्माएको बच्चाहरू धेरै टुहुरा भए । धेरै सुकेनास लाग्यो । कोही गर्भमै रहृयो, जन्मनै पाएनन् । भनाइको मतलव धेरै योजनाहरू ल्याएको, बाटोको योजना, पानीको योजना । स्कुलको योजना, पुलको योजनाहरू, खेलमैदानका योजना धेरै पूरा भएको छैन, अलपत्र छन्, कोही अघि बढ्दै बढेन,’ उनले भने । उनले गण्डकी प्रदेशको मुख्यमन्त्री हुँदा २०७५ मा सुरु गरेको घलेगाउँ जोड्ने कालोपत्र ७ वर्षसम्म पनि पूरा हुन नसकेको उदाहरण दिए ।

‘०७६ मा कोभिड लाग्यो । ०७७ मा ठेकेदार आउनै आनाकानी गर्‍यो । गण्डकी प्रदेशका धेरै ठेकेदारलाई समातेर, बोलाएर, लिएर आएर काम गरायौं,’ उनले भने, 'कान्छाराम तामाङ (कांग्रेस नेता) हो यहाँको ठेकेदार । यो भन्दा अगाडि मसँगै संसद‍्मा हुँदा धेरैपटक कुराकानी गरेँ । अझै अधुरो छ । २ वर्षमा सक्ने भनेको काम ७/८ वर्ष लाग्यो भयो ।’ २०५३ सालतिर यी सडकहरूलाई ग्रीन रोड (हरित सडक)का रूपमा अघि बढाएको उनले बताए ।

‘कोही शिलान्यास भयो, बन्द भएको छ । कुनै हामीले निर्णय गर्‍यौं, कार्यान्वयनमै आएन । गर्भमै रहृयो, जन्मिएन । यस्ता धेरै योजना छन् लमजुङमा,’ उनले भने, ‘कहिले चुनाव हार्ने, कहिले जित्ने । जित्दाचाहिँ मन्त्री हुन नपाउने । मन्त्री भए पनि भनेको मन्त्री हुन नपाउने ।’ उनले बहुवर्षीय योजनाहरू आफू इतरका सरकारले अगाडि नबढाइदिँदा विकासले गति लिन नसकेको बताए । उनले आफू पदाधिकारी भएको हैसियतले पार्टी सरकारमा जाँदा रोजेको मन्त्री हुने अवसर पाइने भन्दै यसपटक पनि जिताउन आग्रह गरे । उनले अधुरा योजना पूरा गर्न आफ्नो उम्मेदवारी रहेको बताए ।