लमजुङ — जिल्ला प्रशासन कार्यालय लमजुङले माघ २० गतेभित्र आफूसँग भएका इजाजतप्राप्त हातहतियार (बन्दुक) बुझाउन नागरिकलाई अनुरोध गरेको छ ।

आगामी फागुन २१ गते हुने प्रतिनिधि सभा सदस्य निर्वाचनलाई स्वच्छ, निष्पक्ष, मर्यादित तथा शान्तिपूर्ण वातावरणमा सम्पन्न गराउन प्रशासनले हतियार बुझाउन आग्रह गरेको हो ।

जिल्ला प्रशासन कार्यालयका सहायक प्रमुख जिल्ला अधिकारी थम्मनसिंह गौतमले चैत २० गतेपछि हातहतियार फिर्ता हुनेछ । निर्वाचनलाई भयरहित वातावरणमा सम्पन्न गराउन माघ २० गतेअगावै सबैखाले हतियार बुझाउन आग्रह गरिएको छ ।

जिल्ला प्रशासन कार्यालय लमजुङअन्तर्गत जिल्ला कमाण्ड पोष्टको माघ ६ गते बसेको बैठकको निर्णयअनुसार सबै इजाजत प्राप्त हातहतियार माघ २० गतेभित्र सम्बन्धित स्थानीय प्रहरी कार्यालयमा बुझाउन निर्देशन दिइएको छ । आफूसँग भएका इजाजत प्राप्त हातहतियार अनिवार्य रूपमा नबुझाए कानुनबमोजिम कारबाही हुने प्रशासनले चेतावनी दिएको छ ।