गण्डकी प्रदेशका ११ जिल्लामध्ये जनाधारको हिसाबले कमजोर मानिने गोरखाबाट एमालेले यस पटक विजयी हुने सुविधासहित देवकोटालाई मौका दिएको हो ।
What you should know
गोरखा — कांग्रेस–एमाले गठबन्धनबाट गण्डकी प्रदेशबाट गोरखाकी सम्झना देवकोटाले राष्ट्रिय सभा सदस्यका लागि उम्मेदवारी दर्ता गराएकी छिन् । एमालेकी नेतृ देवकोटा विगतमा मेयर, उपमेयर र राष्ट्रिय सभामा उम्मेदवार बनेर पराजित भएकी थिइन् ।
गण्डकी प्रदेशका ११ जिल्लामध्ये जनाधारको हिसाबले कमजोर मानिने गोरखाबाट एमालेले यस पटक विजयी हुने सुविधासहित देवकोटालाई मौका दिएको हो ।
गोरखा नगरपालिका–३ नारेश्वरकी देवकोटा २०४५ मा अनेरास्ववियुको सदस्यता लिँदै ०४७ मा नेपाल कम्युनिष्ट पार्टीको सदस्यता लिएर राजनीतिमा होमिएकी थिइन् । अनेरास्ववियुमा गोरखा क्याम्पसको इकाइमा सक्रिय देवकोटा तत्कालीन नारेश्वर गाविसको गाउँ कमिटी, इलाका नम्बर २ को इलाका कमिटी, क्षेत्रीय संयोजक, क्षेत्रीय कमिटी सदस्य बनिन् ।
०६३ मा एमालेको क्षेत्रीय कमिटी सचिव बनेकी देवकोटा ०६६ सालमा एमाले गोरखाको सचिवमा निर्वाचित भएकी थिइन् । तत्कालीन समयमा एमालेमा देशभरका दुई महिला सचिवमध्ये देवकोटा एक थिइन् । ०६८ मा पार्टीको राष्ट्रिय प्रतिनिधि परिषद् सदस्य, अञ्चल कमिटी सदस्य हुँदै ०७८ को दसौं महधिवेशनबाट देवकोटा एमालेको केन्द्रीय सदस्य बनिन् ।
०७९ असारमा केन्द्रीय संगठन विभागको सचिवको जिम्मेवारी लिएर देवकोटाले काम गरिसकेकी छिन् ।
उनै देवकोटा ०७४ को स्थानीय तह निर्वाचनमा एमालेको तर्फबाट गोरखा नगरपालिकाबाट उपमेयर उम्मेदवारी दिए पनि पराजित भइन् । ०७९ को निर्वाचनमा एमालेले देवकोटालाई मेयरको उम्मेदवार बनायो भने ०८० मा राष्ट्रिय सभा सदस्यमा उम्मेदवार बनाएको थियो । तीनवटै चुनावमा देवकोटा पराजित बनिन् । यस पटकको राष्ट्रिय सभा निर्वाचनमा प्रदेश सांसद र स्थानीय तहका प्रमुख, उपप्रमुख मतदाता छन् । तर देवकोटाको दल एमालेबाट गोरखाका ११ वटा स्थानीय तहको प्रमुख, उपप्रमुख र प्रदेशमा पनि प्रतिनिधित्व छैन ।
कांग्रेससँगको गठबन्धनका कारण उनको जित निश्चित जस्तै बनेको छ । ‘पार्टीको जिम्मेवार कार्यकर्ता हुँ, यसअघिका निर्वाचनमा पार्टीले उम्मेदवार बनाए पनि पराजित हुन्छु भनेर थाह हुँदाहुँदै पनि लडेँ,’ देवकोटाले कान्तिपुरसँग भनिन्,‘अहिले गठबन्धन पनि छ, यो अवसर दिँदा खुसी छु ।’
