पोखरा — पोखरा महानगरपालिकाले आफ्नो पहिचानका रूपमा लोकबाजा सारंगीलाई चिनाउन लेकसाइडको बसुन्धरा पार्कमा सारंगीको १५ फिट अग्लो प्रतिमा बनाउने भएको छ । प्रतिमासहितको ‘सारंगी पार्क’ निर्माणका लागि महानगरले ५० लाख रुपैयाँ विनियोजन गरेको छ ।

महानगरपालिकाको ६७औं स्थापना दिवसको अवसरमा १ पुसमा सारंगी पार्कको शिलान्यास गरिने भएको छ । पोखराको बाटुलेचौरसहित विभिन्न वडामा सारंगीवादक गन्धर्व समुदायको बसोबास रहेको छ । सारंगी पोखराको चिनारी र पहिचानका रूपमा स्थापित लोकबाजा हो ।

महानगरले स्थापना दिवस २९ मंसिर, १ र २ पुसमा गरी तीन दिवसीय रूपमा मनाउँदै छ । स्थापना दिवसबारे जानकारी दिन शुक्रबार आयोजित पत्रकार सम्मेलनमा महानगर प्रमुख धनराज आचार्यले सारंगी प्रवर्द्धनका लागि यो पार्क निर्माण गर्न लागिएको बताए । ‘पोखराको मौलिक संस्कृतिको संवाहक सारंगीलाई प्रवर्द्धन गर्न यो पार्क निर्माण गर्न लागिएको हो,’ उनले भने । पोखराको पहिचानका रूपमा चिनाउने सामग्रीका लागि प्रतियोगिताको आयोजना गरेको र उक्त प्रतियोगिताबाट सारंगी छनोट भएको जानकारी उनले दिए ।

स्थापना दिवसका अवसरमा महानगरले विभिन्न क्षेत्रमा योगदान गर्ने पोखरेली नवरत्नहरूलाई सम्मान गर्ने भएको छ । भाषा साहित्य, कला (संगीत नृत्य, नाट्य, चित्रकला), शिक्षा, स्वास्थ्य, कृषि तथा उद्यमशीलता, सामाजिक सेवा, खेलकुद पर्यटन प्रवर्द्धन तथा वातावरण संरक्षण, विज्ञान प्रविधि तथा नवप्रवर्द्धन र अन्य क्षेत्रमा महत्त्वपूर्ण योगदान गर्ने व्यक्तित्त्व मध्येबाट ९ जनालाई २ लाख २ हजार २ सय २ सहित ताम्रपत्र, दोसल्ला र पदक सहित पोखरेली नवरत्न सम्मान गरिनेछ ।

महानगरपालिकामा कार्यरत कर्मचारीहरू मध्येबाट सर्वोत्कृष्ट, उत्कृष्ट र कर्तव्यनिष्ठ गरी ११ जना कर्मचारीलाई महानगरले सम्मान गर्दैछ । महानगरपालिकाका ३३ वटै वडा मध्येबाट सरसफाइमा उत्कृष्ट ३ वटा वडा, महानगर मातहतका कार्यालय मध्येबाट सरसफाइमा उत्कृष्ट कार्यालय र महानगरपालिकालाई तोकिएको समयमा नियमित र सबैभन्दा बढी राजश्व तिर्ने उत्कृष्ट करदाता पनि सम्मानित हुनेछन् । उमेरको ज्येष्ठताका आधारमा महानगर मातापिता (ज्येष्ठ नागरिक) सम्मान कार्यक्रमसमेत महानगरले गर्नेछ । पोखरेली नवरत्न सम्मान, उत्कृष्ट कर्मचारी, करदाता र महानगर मातापिता सम्मान २ पुसमा हुने मूल समारोहमा गरिने महानगर प्रमुख आचार्यले जानकारी दिए ।

माध्यमिक शिक्षा परीक्षा (एसईई) मा ४ जीपीए प्राप्त गर्ने ६७ जना विद्यार्थी र महानगर स्तरीय परीक्षा (कक्षा ८) मा ४ जीपीए प्राप्त गर्ने १२ विद्यार्थी सम्मानित हुनेछन् । कक्षा ८ को परीक्षामा विषयगत रूपमा औसत उपलब्धि हासिल गर्ने ३० जना र एसईईतर्फ ३० जना गरी ६० जना उत्कृष्ट शिक्षक पनि सम्मानित हुनेछन् । कक्षा ८ को परीक्षामा शतप्रतिशत नतिजा हासिल गर्ने १५ वटा, एसईईतर्फ ४९ तथा सामुदायिक र संस्थागत विद्यालयतर्फ सबैभन्दा बढी जीपीए प्राप्त गर्ने १/१ विद्यालय उक्त अवसरमा सम्मानित हुनेछन् । विद्यार्थी, शिक्षक तथा विद्यालय सम्मान कार्यक्रम १ पुसमा हुनेछ ।