गोरखाबाट चितवन जाँदै गरेको बस दुर्घटनामा परेको हो
गोरखा — गोरखा-आँबुखैरेनी–गोरखा सडक खण्डअन्तर्गत गोरखा नगरपालिका-११ बाह्रकिलोमा बस दुर्घटना हुँदा २१ जना घाइते भएका छन् ।
बाह्रकिलो बजारमा रोकिराखेको ना ४ ख १४१९ नम्बरको बस दुर्घटना भएको जिल्ला ट्राफिक प्रहरी प्रमुख सुरज अर्यालले बताए । गोरखाबाट चितवन जाँदै गरेको बस दुर्घटनामा परेको हो ।
‘बसको ब्रेक नलागेको र ओट् पनि नराखी ड्राइभर झरेका बेला बस गुडेर १० मिटर तल खसेको प्रारम्भिक अनुसन्धानबाट देखिएको छ,’ उनले भने ।
बसमा कति यात्रु थिए यकिन भइनसकेको पनि उनले बताए । घाइतेहरूलाई गोरखा अस्पताल पठाइएको र घटनाको थप अनुसन्धान भइरहेको उनले बताए ।
