लमजुङ — जिल्ला प्रशासन कार्यालय लमजुङमार्फत आवेदन दिएका १ हजारभन्दा बढीको राहदानी प्रिन्ट भएर नआउँदा नागरिकहरू समस्यामा परेका छन् । जिल्ला प्रशासन कार्यालयका अनुसार भदौ १९ गतेपछि संकलन गरिएका आवेदनको राहदानी प्रिन्ट भएर आएको छैन ।

समयमै राहदानी नआउँदा वैदेशिक रोजगारीमा जाने, छुट्टीमा आएका, अध्ययन तथा भ्रमणका लागि विदेश जाने तयारीका नागरिकहरू समस्यामा परेका छन् ।

पछिल्लो समय असोज २१ गते हुलाकमार्फत १ सय ९५ वटा राहदानी प्राप्त भएको थियो । त्यसपछि राहदानी प्राप्त नभएको जिल्ला प्रशासन कार्यालय राहदानी फाँटकी नासु (नायब सुब्बा) नेत्रकाशी गुरुङले बताइन् । ‘साढे २ महिनादेखिको राहदानी आएको छैन । राहदानी नै नआएको साढे १ महिना भयो,’ उनले भनिन् ।

उनका अनुसार मंगलबारसम्म संकलित नयाँ ८ सय ९ जना, नवीकरणका लागि आवेदन दिएका १ सय ३८, हराएका ५५, बिग्रिएको १ जना गरी १ हजार ३ जनाको आवेदन संकलन गरिएको छ । संकलितमध्ये ३२ जना नाबालकका आवेदन छन् । संकलित आवेदनमध्ये सुरुका एक लट प्रिन्टमा गएको जानकारी विभागबाट २ साताअघि प्राप्त भएको थियो । तर, प्रिन्ट भएर नआएको नासु गुरुङले बताइन् ।