क्होलासोथार गाउँपालिका–१ मा गुडिरहेको जिपको ठक्करबाट गम्भीर घाइते भएकी बालिकाको उपचारको क्रममा बेंसीसहरमा मृत्यु भएको प्रहरीले जनाएको छ।
लमजुङ — लमजुङको क्व्होलासोथार गाउँपालिका-१, बाग्लुङपानीमा जिपको ठक्करबाट एक बालिकाको मृत्यु भएको छ ।
प्रहरीका अनुसार गुडिरहेको जिपको ठक्करबाट सोही ठाउँकी २ वर्षीया नेरिमा तामाङको मृत्यु भएको हो ।
क्होलासोथार गाउँपालिका–३, घलेगाउँबाट सदरमुकाम बेंसीसहरतर्फ आउँदै गरेको ग१ज ६३०६ नम्बरको जिपले बालिकालाई शुक्रबार बिहान ९ बजेतिर ठक्कर दिएको थियो । गम्भीर घाइते बालिकालाई उपचारको लागि उक्त जिपले नै बेंसीसहरस्थित प्रदेश अस्पताल ल्याएको थियो ।
बालिकाको उपचारको क्रममा बिहान १०ः ३५ बजे बजेतिर चिकित्सकले मृत घोषणा गरेको जिल्ला प्रहरी कार्यालय लमजुङका सूचना अधिकारी प्रहरी निरीक्षक ज्ञानेन्द्र क्षेत्रीले जानकारी दिए ।
जिप र जिपचालक बेंसीसहर नगरपालिका–९, बिम्दाबेंसीका २९ वर्षीय मदन दुलाललाई प्रहरीले नियन्त्रणमा लिएको छ । दुर्घटनाबारे अनुसन्धान भइरहेको प्रहरीले जनाएको छ । बालिकाको शव परीक्षणका लागि अस्पतालमा राखिएको प्रहरीले जनाएको छ ।
