कास्की — गण्डकी प्रदेश सरकारको चालु आर्थिक वर्ष २०८२/८३ को कुल बजेटमध्ये पहिलो त्रैमासिकमा ८.३१ प्रतिशत रकम खर्च भएको छ ।

कुल विनियोजित ३१ अर्ब ९७ करोड ९९ लाख ९९ हजारमध्ये असोजसम्म २ अर्ब ६५ करोड ६१ लाख १५ हजार रुपैयाँ खर्च भएको प्रदेश लेखा नियन्त्रक कार्यालय गण्डकीको तथ्यांक छ । आर्थिक वर्ष२०८१/८२ को पहिलो त्रैमासिकमा कुल बजेटको ९.५५ प्रतिशत खर्च भएको थियो ।

असोज मसान्तसम्म १ अर्ब १२ करोड ७३ लाख २१ हजार .रुपैयाँ चालु र १ अर्ब ५२ करोड ८७ लाख ९४ हजार रुपैयाँ पुँजीगत खर्च भएको कार्यालय प्रमुख सुरेश सुवेदीले जानकारी दिए । सरकारले चालुतर्फ १२ अर्ब ६३ करोड ६६ लाख ७५ हजार र पुँजीगततर्फ १९ अर्ब ९ करोड ३३ लाख २४ हजार रुपैयाँ विनियोजन गरेको थियो । 
चालु आर्थिक वर्षको ३ महिनामा सबैभन्दा धेरै खर्च भौतिक पूर्वाधार विकास तथा यातायात व्यवस्था मन्त्रालयले गरेको छ । विनियोजितमध्ये ३७.४८ प्रतिशत बजेट पाएको यो मन्त्रालयले १ अर्ब ९ करोड ३० लाख ८२ हजार ३ सय १२ रुपैयाँ खर्च गरेको कार्यालयको तथ्यांक छ । यो कुल खर्चको ४१.१७ प्रतिशत हो । भौतिक मन्त्रालयले यो अवधिमा पुँजीगततर्फ १ अर्ब १ करोड ९३ लाख ९० हजार र चालुतर्फ ७ करोड ३६ लाख ९१ हजार ९ सय १९ रुपैयाँ खर्च गरेको छ ।