मोटरसाइकलको आवाजको विवादमा भएको कुटपिटपछि मृत्यु भएका ढालबहादुर थापाको घटनामा फरार खवासलाई प्रहरीले अदालतमा पेश गरेको छ।
स्याङ्जा — कर्तव्य ज्यान मुद्दाका फरार प्रतिवादी ६५ दिनपछि पक्राउ परेका छन् । पक्राउ पर्नेमा स्याङ्जाको चापाकोट नगरपालिका–५ काम्तीका १९ वर्षीय पर्वत खवास रहेका छन् । प्रहरीले उनलाई कात्तिक ११ गते घरमै पुगेर पक्राउ गरेको जनाएको छ ।
खवास संलग्न घटना गत भदौ ७ गतेको हो । वालिङ नगरपालिका–५ जर्कोटमा मोटरसाइकल चर्को आवाजमा चलाएको विषयमा स्थानीय युवाबीच वादविवाद हुँदा सोही वडाको बाहुन डाँडाका ३२ वर्षका ढालबहादुर थापामाथि कुटपिट गरिएको थियो । घाइते थापाको उपचारको क्रममा मृत्यु भएको थियो ।
सोही घटनाको अनुसन्धानका क्रममा फरार रहेका खवासलाई पक्राउ गरी प्रहरीले बुधबार जिल्ला अदालतमा पेस गरेको थियो । जिल्ला अदालतले बिहीबार खवासलाई पुर्पक्षका लागि जिल्ला कारागार चलान गरेको छ ।
उक्त घटनामा संलग्न सात जनामध्ये अन्य सात जनालाई भने गत असोज २ गते नै पुर्पक्षका लागि जिल्ला कारागार चलान गरिएको जिल्ला प्रहरी प्रमुख दधिराम न्यौपानेले जानकारी दिएका छन् ।
