प्रशासन, सेना र प्रहरीको सहकार्यमा खाङसारदेखि मनाङ गाउँसम्म डोजर परिचालन गरी बाटो खुलाउने काम भइरहेको प्रमुख जिल्ला अधिकारीको भनाइ छ।
What you should know
लमजुङ — हिमपातका कारण अवरुद्ध माथिल्लो मनाङमा पर्ने मनाङ ङिस्याङ गाउँपालिका ९, खाङसारसम्मकै सडक खुलेको छ । बढी हिमपात भएको क्षेत्र हुम्डेदेखि मनाङसम्मको करिब ८ किलोमिटर सडक मंगलबार साँझसम्म खुलाइएकोमा मनाङदेखि खाङसारसम्मको करिब करिब ६ किलोमिटर सडक बुधबार खुलाइएको छ ।
प्रमुख जिल्ला अधिकारी नवराज पौड्यालका अनुसार सडक खुलाउन खाङसारदेखि मनाङ गाउँतर्फको लागि एउटा डोजर, हुम्डेदेखि मनाङगाउँ तर्फको लागि एउटा डोजर र हुम्डेमा एउटा जोडर परिचालन गरिएको थियो । मनाङ ङिस्याङ गाउँपालिका, निर्माण व्यावसायीसँगको समन्वयमा मेसिनरी सामान प्रयोग गरिएको र नेपाली सेना, सशस्त्र प्रहरी, नेपाली प्रहरीसहितको सुरक्षा फौजले बाटो खुलाएको उनले बताए ।
उनका अनुसार तिलिचो र थोराङ्ला क्षेत्रबाट तल झर्नुपर्ने पर्यटक सबैलाई सवारीसाधनको व्यवस्थापन गरी पठाउने क्रम जारी छ । ‘केही गाडी आउने क्रममा छन् । हामीले सबैलाई तल्लो क्षेत्र आफ्नो गन्तव्यमा जाने पर्यटकलाई पठाएका छौँ,’ उनले भने ।
उनका अनुसार खाङसारबाट करिब ४ सय, माथिल्लो मनाङ क्षेत्रबाट करिब ३ सय र विभिन्न ठाउँबाट गरी करिब ३ सय जना पर्यटकहरू हिँडेर वा सवारी साधनमार्फत तल्लो क्षेत्रमा गएको हुन सक्ने बताए । ‘केही पर्यटक मौसम खुलेपछि गन्तव्यमा जाने भनेर बसेका छन् । मौसम खुला नभएसम्म माथिल्लो क्षेत्रमा जान प्रतिबन्ध लगाएका छौँ,’ उनले भने, ‘मौसम खुला भएपछि त जान सकियो ।’
उनका अनुसार प्रशासन, प्रहरी, सेना, स्थानीय तहको गरी ६ वटा सवारीसाधनले समेत अप्ठ्यारोमा परेकालाई उद्धार सहजीकरण गरिरहेको बताए । उनले मनाङ र हुम्डेबाट गरी २५ वटा भन्दा बढी जिप पर्यटक लिएर बेंसीसहरतर्फ गएको बताए ।
उनका अनुसार सडक खुलाउन खाङसारदेखि मनाङ गाउँतर्फको लागि एउटा डोजर, हुम्डेदेखि मनाङगाउँ तर्फको लागि एउटा डोजर र हुम्डेमा एउटा जोडर परिचालन गरिएको बताए । ‘मनाङ गाउँसम्म चामेदेखि बाटो खुल्ला भएको छ । अब खाङसार सम्म हो । खाङसारसम्म बाटो खुलेपछि सबै पर्यटक तल्लो क्षेत्र झर्छन्,’ उनले भने ।
