नवलपरासी — विगत ६ वर्षदेखि बिरामी रहेको एउटा गैंडा देवचुली नगरपालिकाको शिशवार क्षेत्रमा शनिबार मृत फेला परेको छ ।

निकुञ्जका सूचना अधिकारी अविनाश थापाका अनुसार चितवन राष्ट्रिय निकुञ्जअन्तर्गत पूर्वी नवलपरासीमा पर्ने  शिशवार क्षेत्रमा रहेको आँपको बगैंचामा अन्दाजी ३२ वर्षको पोथी गैंडा मृत अवस्थामा फेला परेको हो ।

सूचना अधिकारी थापाका अनुसार विगत लामो समयदेखि आँपको बगैंचालाई वासस्थान बनाउँदै आएको उक्त गैंडा विगत केही समयदेखि बिरामी थियो । बिरामी र बूढो रहेको उक्त गैंडालाई यसअघि पनि पटक–पटक राष्ट्रिय प्रकृति संरक्षण कोषका चिकित्सकको टोलीले आँपको बगैंचामै आएर उपचार गरेको थियो । मृत फेला परेको गैंडाको खाग र खुर सुरक्षित छ ।

यससँगै चितवन राष्ट्रिय निकुञ्जमा गत साउनयता मात्रै ५ वटा गैंडाको मृत्यु भएको छ । गत आर्थिक वर्षमा निकुञ्जमा २८ वटा गैंडाको मृत्यु भएको थियो । पछिल्लो गणना अनुसार निकुञ्जमा ६ सय ९४ गैंडा रहेको तथ्यांक छ ।