लमजुङ — मनाङको नार्पाभूमि गाउँपालिका–४, याकखर्कमा लेक लागेर थप एकजनाको मृत्यु भएको छ।

जिल्ला प्रशासन कार्यालय मनाङका अनुसार नुवाकोटको किस्पाङ गाउँपालिका–१ का ४९ वर्षीय साम्बा घलेको शुक्रबार दिउँसो ३ बजेतिर लेक लागेर घटनास्थलमै मृत्यु भएको हो।

यसअघि शनिबार मात्रै सोही क्षेत्रमा पर्ने काङ्ला फेदीमा लमजुङको क्व्होंलासोथार गाउँपालिका–४, भुजुङका डिलबहादुर गुरुङको लेक लागेर मृत्यु भएको थियो।

मनाङका प्रमुख जिल्ला अधिकारी नवराज पौड्यालका अनुसार साम्बा घले याकखर्कमा पर्यटकको भारी बोकेर फर्कने क्रममा अस्वस्थ भएका थिए । उनी बिरामी परेको केही समयमा नै निधन भएको मृतकका ज्वाइँ मारिस तामाङले जानकारी दिएका छन् ।

मौसम खराबीका कारण तत्काल उद्धार कार्य सम्भव नभएको जिल्ला प्रशासन कार्यालयले जनाएको छ ।