माग पूरा नभए बुधबारदेखि पूर्ण रुपमा पेनडाउन गर्ने चेतावनी
What you should know
कास्की — पारिश्रमिक वृद्धिको माग गर्दै पोखराको नयाँबजारस्थित गण्डकी मेडिकल कलेज (जीएमसी)का नर्सले आन्दोलन थालेका छन् । पछिल्लो ४ दिनदेखि मणिपाल शिक्षण अस्पतालका नर्सले गरिरहेको आन्दोलन अर्को ठूलो निजी मेडिकल कलेज जीएमसीमा पनि सोमबार साँझदेखि सुरू भएको हो ।
दिनभर आफ्ना माग सुनाउन नर्सहरुको समूह अस्पताल प्रशासन र मेडिकल सुपरीटेन्डेन्टकहाँ पुगेका थिए । तर, माग पूर्णरुपमा पूरा गर्न सम्भव नरहेको जवाफ पाएपछि उनीहरु साँझदेखि आन्दोलित बनेका हुन् ।
नर्सहरुले साँझ एक घण्टा प्लेकार्डसहित अस्पतालको प्रयोगशालाअघि भूइँमा बसेर नाराबाजी गरे । उनीहरुले ‘श्रम शोषण बन्द गर्’, ‘नेपाल सरकार न्याय दे’लगायत नारा लगाए । ‘हामी मेसिन होइनौं’, ‘नो नर्स, नो हेल्थ केयर’, ‘हामीलाई न्याय चाहियो’, ‘नर्सिङ पेसा बचाऔं’लगायत नारा लेखिएका प्लेकार्ड उनीहरुको साथमा थियो ।
नर्सहरुले केही वार्डको सेवा सोमबार साँझदेखि आंशिक रुपमा ठप्प पारेका छन् । बुधबार दिउँसो १ बजेसम्म माग पूरा नभए पूर्ण रुपमा पेनडाउन गर्ने एक नर्सले बताइन् । ‘अर्थो वार्ड, गाइनो, एचसीयूमा हामीले अहिल्यैदेखि पेनडाउन गरिसक्यौं,’ ती नर्सले भनिन्, ‘हाम्रो माग बुधबार दिउँसोसम्म पूरा नभए आईसीयू, सीसीयू, एनआइसीयू, डायलासिस, इमर्जेन्सीमा पनि पेनडाउन गर्छौं ।’
जीएमसीमा करिब साढे ३ सय नर्स कार्यरत छन् । सरकारले ०८१ मंसिर २७ मा स्वास्थ्य संस्थामा कार्यरत नर्सिङ र स्वास्थ्यकर्मीको पारिश्रमिक, सेवा–सुविधा सरकारीसरह नघट्ने गरी लागू गर्नुपर्ने निर्णय गरेको थियो ।
पोखराका दुई ठूला अस्पतालका नर्स यही प्रमुख मागसहित आन्दोलनमा उत्रिएका हुन् । दुवै अस्पतालका सञ्चालक हालभन्दा पारिश्रमिक केही थप गर्न तयार रहे पनि सरकारीसरह दिन सम्भव नरहेको बताइरहेका छन् ।
