लमजुङ — लमजुङ र मनाङको सिमानामा पर्ने दूधपोखरी कुण्ड (५,३०० मि.) मा साउन २४ गतेदेखि नुहाउने क्रममा हराएका एकजना किशोरको शव फेला परेको छ ।

लमजुङको क्व्होलासोथार गाउँपालिका-४, भुजुङका १८ वर्षीय मनोज गुरुङ जनैपूर्णिमाका दिन दूधपोखरीमा पौडी खेल्ने क्रममा हराएका थिए । उनको शव हेलिकप्टरमार्फत पुगेको गोताखोरसहित सशस्त्र प्रहरी टोलीले फेला पारेको हो ।

गाउँदेखि हिँडेर २ दिन लाग्ने दूधपोखरीमा नुहाउने जात्रामा साथीहरुसँगै गएका उनी पौडी खेल्ने क्रममा केही पर पुगेका थिए । उनीसहित ९ जना साथीहरु दूधपोखरी नुहाउने जात्रामा गएका थिए । हराएका किशोरलाई स्थानीय र प्रहरी पुगेर खोजी गरे पनि यसअघि भेटिएका थिएनन् ।

गाउँपालिका अध्यक्ष सूर्यप्रसाद गुरुङले गाउँपालिकाले व्यवस्थापन गरी शुक्रबार पोखराबाट एयर डाइनेस्टीको हेलिकोप्टरमा गोताखोरसहित ४ जना सशस्त्र प्रहरी पठाइएको थियो । टोलीले पोखरीबाट उद्धार गरेको शवलाई मृतकका सहोदर दाइ रेकबहादुर गुरुङले सनाखत गरेपछि कानुनी प्रक्रिया पूरा गरेर उक्त ठाउँबाट केही पर गाढेको छ ।