नवलपुर — इलाका प्रशासन कार्यालयको माग राख्दै पूर्वी नवलपरासीका जनप्रतिनिधिले गृहमन्त्री रमेश लेखकलाई ज्ञापनपत्र बुझाएका छन् । २०७८ मा जिल्लाका सबै सरोकारवालाले पहाडी भेगका लागि बुलिङटार ६ अत्रौलीमा इलाका प्रशासन कार्यालय स्थापना गर्नका लागि गृह मन्त्रालय सिफारिस गरेका थिए ।

तर, मन्त्रिपरिषद्ले पछिल्लो पटकको निर्णयमा पनि नवलपुर नपरेपछि स्थानीयले विरोध र राजनीतिक दलको पहुँच नपुगेको भन्दै आलोचना गरेका थिए । 

क्षेत्र नम्बर १ का सांसद शशांक कोइरालाको नेतृत्वमा गएको प्रतिनिधिमण्डलले गृहमन्त्री लेखकलाई भेटेर ज्ञापनपत्र बुझाएको हो । पहाडी भेगका नागरिकका लागि जिल्ला सदरमुकाम कावासोतीसम्म पुग्न ५० किलोमिटरभन्दा बढी पहाडी भेगमा जोखिम यात्रा गर्नुपर्ने र प्रशासनिक सेवाका लागि सर्वसाधारणलाई समस्या भएको भन्दै स्थानीय जनताको सुविधाका लागि इलाका प्रशासन कार्यालय स्थापना अपरिहार्य रहेको ज्ञापनपत्रमा उल्लेख छ ।  

यसअघि पनि सम्बन्धित निकायमा माग दर्ता भए पनि कार्यान्वयन नभएकाले यसपटक गृह मन्त्रालयसँग गम्भीर पहल गर्न आग्रह गरिएको छ । यसैगरी विनयी त्रिवेणी गाउँपालिकाको वडा नम्बर ६ र ७ का बासिन्दालाई पालिकाको केन्द्र आउन लुम्बिनी प्रदेश हुँदै आउनुपर्ने बाध्यता भएकाले इलाका प्रशासन वा विशेष क्षेत्र बनाएर सेवा प्रदान गर्न माग गरिएको छ ।