खेलाडीको दक्षता अभिवृद्धिमा यो समझदारीले महत्त्वपूर्ण योगदान गर्ने उनको विश्वास छ । ‘फुटबल, बक्सिङ, तेक्वान्दो, भलिबल, ब्याडमिन्टन, टेबलटेनिस, लनटेनिस, एथ्लेटिक्स, म्याराथनलगायत खेलमा हाम्रा खेलाडीको दक्षता अभिवृद्धि गर्न र विशेषज्ञता हासिल गर्न यो समझदारी महत्त्वपूर्ण हुनेछ,’ प्रमुख आचार्यले भने, ‘पर्यटकीय राजधानी पोखरालाई खेलकुदको हब बनाउने सन्दर्भमा अन्तर्राष्ट्रिय सहकार्यले यसको औचित्य पुष्टि गरेको छ ।’ पोखरेली र कोरियाली खेलाडीबीच नियमित मैत्रीपूर्ण खेलको व्यवस्था मिलाउने र कोरियाली प्रशिक्षकको मार्गदर्शनमा पोखराका खेलाडीको क्षमता अभिवृद्धि गर्न समेत सहज हुनेछ ।

चेओङ्ग योङ काउन्टी खेलकुद समितिका अध्यक्ष हान ग्वाङ् सेओकले पोखराका खेलाडीको प्रदर्शनमा सुधार गर्न उन्नत प्रविधि र प्रशिक्षण विधि प्रदान गरिने बताए । युवा खेलाडी आदानप्रदान, विद्यालय स्तरका खेलकुद कार्यक्रम सञ्चालन, पोखरामा रहेका खेलकुद संस्थालाई व्यावसायिक स्तरको सीप विकासमा सहयोग, समग्र पोखरा महानगर भित्रका खेलकुद गतिविधिका सम्भाव्य क्षेत्रको खोजी गर्न आफूहरु तत्पर रहेको उनको भनाइ थियो ।