लमजुङ — पोखरेली पर्यटक डाक्न लमजुङको मर्स्याङ्दी गाउँपालिका प्रदेश राजधानी पोखरा पुगेको छ । पोखरा पुगेर मर्स्याङ्दीले पोखरेली पर्यटन व्यावसायीसँग अन्तरक्रिया छलफल गरेको छ ।

मर्स्याङ्दीले बिहीबार पोखरा पुगेर व्यवसायीसँग पर्यटन क्षेत्रको सम्भावना, विकास, रणनीति र प्रवर्द्धनका उपायबारे जानकारी गराउँदै अन्तरक्रिया गरेको हो ।

कार्यक्रममा सहभागीले लमजुङको मर्स्याङ्दी गाउँपालिका पर्यटकीय दृष्टिकोणले निकै सम्भावना भएको र पर्यटकीय गन्तव्यका रुपमा स्थापित गर्न दीर्घकालीन योजना, पूर्वाधार विकास, स्थानीयस्तरमा जागरण र अन्तरसंस्थागत सहकार्य आवश्यक रहेको धारणा राखेका थिए ।

मर्स्याङ्दी गाउँपालिकाको प्राकृतिक सम्पदा, सांस्कृतिक विविधता, हिमाली सौन्दर्य र साहसिक पर्यटनका सम्भावनाहरूलाई व्यवस्थित ढंगले विकास गर्न सके यस क्षेत्र महत्वपूर्ण पर्यटकीय गन्तव्य बन्न सक्नेमा सहभागीले विचार व्यक्त गरेका थिए ।

पोखरा महानगरपालिका-६ स्थित होटल इलिगेन्टमा आयोजित अन्तरक्रिया तथा छलफलमा पर्यटन प्रवर्द्धनका लागि रणनीतिक साझेदारी, प्रचारप्रसार तथा आगामी योजनाको खाका तय गर्न महत्वपूर्ण छलफल भएको गाउँपालिका अध्यक्ष अर्जुन गुरुङले बताए । उनले पोखराबाट लमजुङ आउजाउ गर्न स्थलमार्गको सहजता बताउँदै पर्यटकलाई लमजुङ र लमजुङको पनि मर्स्याङ्दी गाउँपालिकामा आउने वातावरण मिलाइदिन पोखराका पर्यटन व्यवसायीलाई आग्रह गरे ।

उनका अनुसार गाउँपालिकाले पर्यटन पूर्वाधार निर्माण गरिरहेको, मार्गचित्र तयार पारेको र प्रचार–प्रसार अभिवृद्धि गरी निजी क्षेत्रसंग सहकार्य बढाउने योजनासमेत अघि सारेको छ ।