What you should know
कास्की — पोखराको बाटुलेचौरस्थित १ सय ३४ रोपनी जग्गा भूमाफियालाई दिलाउने योजनाअनुसार छोरामार्फत ३२ लाख रुपैयाँ घूस बुझेको आरोप लागेका भूमि व्यवस्था, सहकारी तथा गरिबी निवारणमन्त्री बलराम अधिकारीलाई कारबाही गर्नुपर्ने विषय एमाले कास्कीको जिल्ला भेलामा उठेको छ ।
शनिबार आयोजित भेलामा बोल्ने क्रममा पार्टी केन्द्रीय सदस्य एवं जिल्ला इन्चार्ज कृष्णबहादुर थापा र जिल्ला अध्यक्ष बैनबहादुर अधिकारी क्षेत्रीले बिचौलियासँग मिलेर पार्टीलाई बद्नाम गर्ने व्यक्तिलाई मन्त्रीबाट हटाउने र पार्टीबाट कारबाही गरिनुपर्ने माग गरेका हुन् । दुवैले मन्त्री अधिकारीको नाम भने लिएका थिएनन् । `बिचौलियासँग मिलेर सरकार र पार्टीलाई बद्नाम गर्ने व्यक्तिले राजीनामा दिनु उचित हुन्छ । पार्टीले पनि त्यस्ता व्यक्तिलाई कारबाही गर्नुपर्छ भन्ने विषय उठेको हो,´ जिल्ला उपाध्यक्ष भेषराज बरालले भने, `बोल्ने क्रममा विषय उठ्यो । थप केही भएन ।´
भेलामा एमालेमा आबद्ध बिचौलिया सुजन लामालाई पनि कारबाही गर्नुपर्ने विषय वक्ताबाट उठेको थियो । लामा हाल एमाले प्रदेश कमिटीको सल्लाहकार परिषद् सदस्य रहेको र सम्बन्धित कमिटीले कारबाही नगरे जिल्लाले गर्ने अध्यक्ष अधिकारीले बताएका थिए । लामालाई कारबाहीका लागि एकपटक प्रदेश कमिटीलाई मौखिक आग्रह गरिने उनको भनाइ थियो ।
कास्कीबाट पार्टी सदस्यता लिएका लामा एमाले प्रदेश कमिटीका पूर्वसदस्य हुन् । २०८० असोजको दोस्रो प्रदेश अधिवेशनमा उनी सदस्यमा पराजित भएका थिए । यसपछि उनी सल्लाहकार परिषद्मा मनोनीत भए ।
जिल्ला कमिटीले बैनबहादुर गुरुङ, केशव आचार्य र शोभामोहन पौडेलको नाम सिफारिस गरेको थियो । त्यसमा प्रदेश कमिटीले पुन र अर्का नेता दीपक पौडेलको नाम थपेर सिफारिस गरेको थियो । एमाले प्रदेश कमिटी सदस्य रहेको भन्दै पुनको नाम पनि सिफारिस गरिनुपर्ने लबिइङमा लामा सक्रिय थिए ।
पुन तिनै नेता हुन् जसलाई आयोगको कास्की अध्यक्ष बनाएर आफू अनुकूल निर्णय गराउने योजनामा बिचौलिया लामा थिए । पुनलाई नै अध्यक्ष बनाउन उनले सामान्य प्रशासनमन्त्री राजकुमार गुप्ता र भूमि व्यवस्थामन्त्री अधिकारीलाई घुस प्रस्ताव गरेका थिए ।
