पूर्वी नवलपरासी — वर्षाले अवरुद्ध भएको दाउन्ने सडकखण्डमा साना सवारी साधन सञ्चालनमा आएका छन् । आइतबार बिहानको वर्षापछि दाउन्नेमा गाडी फसेर दिउँसो १२ बजेदेखि यातायात ठप्प भएको थियो । 

वर्षा रोकिएपछि अहिले साना गाडी र यात्रुवाहक बसहरू चल्न थालेका छन् । त्यहाँ फसेका गाडी निकालेर मालवाहक ट्रक र लरी आउजाउमा रोक लगाएर साना गाडी सञ्चालनमा ल्याइएको हो । 

पूर्वी नवलपरासीका प्रहरी उपरीक्षक यादव ढकालका अनुसार राजमार्ग हुँदै पूर्व–पश्चिम हिँडेका सबै मालवाहक गाडी दुम्कीबास र बर्दघाटमा रोकिएपछि साना गाडी र बसहरू सञ्चालनमा आएका हुन्। ढकालका अनुसार आइतबार दिउँसो साढे ३ बजेदेखि त्यहाँ यातायात सञ्चालन भएको हो।

पूर्वी नवलपरासीको दुम्कीबास र पश्चिम नवलपरासीको बर्दघाट बजारको बीचमा पर्ने १४ किलोमिटर लामो दाउन्ने सडकमा वर्षा हुनासाथ हिलो लागेर गाडी फस्ने र यातायात ठप्प हुने समस्या दिनहुँजसो दोहोरिइरहेको छ ।