बागलुङ — जैमिनी नगरपालिकाको न्यायिक समितिले आयोजना गरेको आमा समूह सम्मेलनले समाजमा विभेद अन्त्य, मेलामिलप कायम र दुर्व्यसनविरुद्ध अभियान संचालन गर्ने निष्कर्ष निकालेको छ ।

शनिबार जैमिनीमा भएको सम्मेलनले समुदायस्तरमा लागूऔषधको दुरुपयोग रोक्ने, जुवातास र मादक पदार्थ सेवनलाई नियन्त्रण गर्ने, बालविवाह, बहुविवाह, दाइजो प्रथा र जातीय भेद्भाव पूर्ण रुपमा अन्त्य गर्ने समेत निर्णय गरेको छ । युवा पुस्तामा बढेको दुर्व्यसन रोक्ने र सामाजिक कुरीति नियन्त्रणका लागि समाजका सबैजना एकजुट भइ चेतनामूलक कार्यक्रममा जुट्ने गरी सम्मेलनले ११ बुँदे घोषणपत्र पनि जारी गरेको छ । 

विकास र न्यायका लागि सबै तहमा महिला सहभागिताको सुनिश्चिता, पहुँच विस्तार र घरदेखि सहरसम्म समान कामको समान ज्याला कायम गराउने प्रतिबद्धतासमेत घोषणापत्रमा उल्लेख छ । 

नगर उपप्रमुख हरिहर शर्मा, आमा समूहहरुको तर्फबाट जैमिनी ७ को जैदी आमा समूहकी अध्यक्ष कलाबती राना र ज्येष्ठ मेलमिलापकर्ता गोपालप्रसाद शर्माको हस्ताक्षरमा घोषणापत्र जारी भएको हो । अपांग, महिला, दलित र पछाडि पारिएका समुदायको हक र न्यायका लागि सबैले सामूहिक पहल गर्ने प्रतिबद्धता जनाउने पनि घोषणापत्रमा उल्लेख छ । 

सम्मेलनमा उच्च अदालत बागलुङका मुख्य न्यायाधीश नातीबाबु लामिछाने, प्रमुख जिल्ला अधिकारी कुमानसिंह गुरुङ, प्रमुख प्रशासकीय अधिकृत श्रीकृष्ण पौडेल, वरिष्ठ अधिवक्ता तथा मेलमिलाप अभियन्ता कुमार आचार्य र अधिवक्ता तथा महिला अधिकारकर्मी गीता श्रीषले सहजीकरण गर्दै आमा समूहलाई समाजको पहिलो उत्तरदायी नागरिक बनाउन प्रयास गर्ने बताए । ‘समाजमा हुने स-साना झैझगडा र विवादको मूल कुरा थाह पाउने नै आमा समूह हो, उनीहरुलाई मेलमिलापकर्ता बनाएमा न्याए छिटो पाइने र समाजमा शान्ति स्थापना गर्न सकिन्छ,’ उनले भने, ‘संघीयताले सबै विषयमा अदालत जाने पद्धतिको अन्त्य गरेको छ ।’