बागलुङ — गलकोट नगरपलिकाले नीति र बजेटमा नागरिकको स्वास्थ्यलाई प्राथमिकतामा राखेको छ । बजेटमा पनि स्वास्थ्य क्षेत्र प्राथमिकतामा परेको हो ।

नगर प्रमुख भरत शर्मा गैरेले ल्याएको नीति तथा कार्यक्रममा नगर अस्पतालमा मिर्गौला रोगीलाई हेमोडाइलाइसिस सेवा विस्तार गर्ने, मुटुरोग सहितका दीर्घरोगको निःशुल्क उपचार र हृदयघात रोकथाम कार्यक्रम संचालन गरिने भएको हो । सोही नीतिमा टेकेर उपप्रमुख फमलाल निउरेले नगर अस्पताललाई १ करोड बजेट विनियोजन गरेका छन् ।

हाल १० बेडको अस्पताल मात्रै संचालन गरेको गलकोटले आगामी वर्ष १५ शय्याको अस्पताल बनाएर विपन्न नागरिकको निःशुल्क उचारसमेत गराउने नीतिमा उल्लेख छ । नीतिमै उपप्रमुखसँग थ्राम्बोलाइसिस (हृदयघात रोकथाम) कार्यक्रम पनि संचालनमा ल्याउने उल्लेख छ । ७१ करोड ७४ लाखको बजेटमा स्वास्थ्य क्षेत्रमा मात्रै ५ करोड ३७ लाख बजेट विनियोजन भएको हो । 

नगर स्तरीय विपन्न नागरिक उपचार कोष पनि संचालनमा ल्याइने भएको छ । आर्थिक विपन्न परिवारले विशिष्टीकृत सेवा पनि निःशुल्क पाउने छन् । नगरले सोही कोषबाट रकम भुक्तानी गर्ने उल्लेख छ ।  नगर अस्पताल सहित नगरभित्रका सबै स्वास्थ्य संस्थालाई पेपरलेस बनाउने, सबै स्वास्थ्य चौकी, सामुदायिक स्वास्थ्य इकाइ समेतमा डिजिटल विधि मार्फत रेकर्ड राख्ने व्यवस्था गरिएको छ ।