नवलपरासी — ६ दिनदेखि दाउन्नेमा फसेका करिब १८ सय गाडीलाई गन्तव्यमा पठाइएको छ । शुक्रबारदेखि दाउन्नेमा फसेका गाडी हटाउन सुरु गरिएको हो ।

हिलो र खाल्डैखाल्डा रहेको दाउन्ने सडकमा ग्राभेल राख्न भन्दै मर्मतसम्भार चलिहरँदा हिलो भएपछि त्यहाँ जाममा फसेका सबैजसो गाडी निकालेर गन्तव्यतर्फ पठाइएको हो ।

पूर्वी नवलपरासीका प्रहरी उपरीक्षक यादव ढकालका अनुसार राजमार्ग निर्माण गर्ने ठेकेदारले दाउन्नेमा सडक मर्मत गर्नका लागि दाउन्ने खाली गर्नु परेको हो । त्यहाँ ग्राभेल राखेर सडक सम्याउन सडक खाली गर्न परेको हो । दाउन्ने पारीको बर्दघाटदेखि पूर्वतर्फको दुम्कीबास बजार र होङ्सी सिमेन्ट कारखाना गेटसम्मका गाडी  दुई दिन लगाएर हटाइएको हो । त्यहाँ अलपत्र परेका गाडी एक लाइनमा पार्किङ गरेर राखिएको र धेरैलाई गन्तव्यतर्फ पठाइएको ढकालले जानकारी दिए ।

दुम्कीबास बजारदेखि ४ किलोमिटर पश्चिममा रहेको विश्वकर्मा मन्दिर छेउछाउमा हिलोका कारण गाडी फसेपछि दाउन्ने सडक गत ६ दिनदेखि अवरुद्ध रहेको छ । लामा मालवहाक ट्रक हिलोमा फस्ने र चिप्लिने जोखिम उस्तै छ । सामान्य वर्षात हुनासाथ त्यहाँ उकालो रहेको स्थानमा गाडी उक्लिन सक्दैन । त्यो स्थानमा ग्राभेल हालेर सडकको चाँजोपाँजो मिलाउन प्रहरीले दाउन्ने सडक खाली गराएको हो ।