पोखरा — पोखरामा एक सुनचाँदी पसलका सञ्चालकलाई झूटो यौन दुर्व्यवहारको आरोप लगाई ५० लाख माग्ने योजना बनाएका तीनजना व्यक्तिलाई प्रहरीले पक्राउ गरेको छ ।
घटनामा संलग्न तीनै जनालाई कास्की जिल्ला अदालतबाट सात दिनको म्याद थप गरी अनुसन्धान अघि बढाइएको कास्की प्रहरी कार्यालयले जनाएको छ । घटनाको सुरुआत पोखरा महानगरपालिका–४ मा रहेको एक सुनचाँदी पसलमा कार्यरत महिलाबाट भएको थियो ।
प्रहरीले जनाएअनुसार ती महिलाले मोरङ र संखुवासभामा बस्ने आफ्ना दुईजना पुरुष साथीलाई बोलाई मिलेमतोमा एक योजनाबद्ध षड्यन्त्र गरेका थिए । उनीहरूले पसल सञ्चालकको श्रीमतीलाई लेकसाइडस्थित होटलमा एक सातासम्म राखी ‘तपाईंले जिन्दगीभर चल्ने धनसम्पत्ति, बस्नका लागि घर र व्यवसाय सञ्चालनको व्यवस्था गरिदिनुहोस्, नभए तपाईंको श्रीमानमाथि यौन दुर्व्यवहार लगायतका मुद्दा लगाएर सडाइदिन्छौं’ भन्दै धम्की दिएका थिए ।
उक्त धम्की र रकम असुली प्रयासको जानकारी पाएपछि कास्की प्रहरी कार्यालयबाट खटिएको टोलीले उनीहरूलाई पक्राउ गरेको हो । पक्राउ पर्नेमा पोखरा महानगरपालिका–१५, टुटुंगा बस्ने २७ वर्षीया मरियम राई, मोरङको विराटनगर चोक घर बताउने ३८ वर्षीय देव लिम्बु र संखुवासभाको सभापोखरी गाउँपालिका–२ बस्ने ४० वर्षीय टेकबहादुर सुवेदी रहेका छन् ।
पक्राउ परेकासँगै प्रहरीले घटनासँग सम्बन्धित प्रमाणका रूपमा तीन थान मोबाइल, ‘बार्गेनिङ’ गरिरहेको अडियो क्लिप भएको एक थान पेनड्राइभ तथा अन्य कागजातसमेत बरामद गरेको छ । प्रहरीले यसलाई संगठित रूपमा जबर्जस्ती रकम असुल्ने प्रयास (एक्सटर्सन) र आपराधिक विश्वासघातसम्बन्धी अपराधको रूपमा लिई अनुसन्धान गरिरहेको जनाएको छ ।
जिल्ला प्रहरी कार्यालय कास्कीका प्रवक्ता प्रहरी नायब उपरीक्षक हरिबहादुर बस्नेतका अनुसार घटनामा संलग्न सबै प्रमाणसहित मुद्दा दर्ता भइसकेको छ । अनुसन्धानलाई तीव्र पारिएको घटनालाई गम्भीर रुपमा लिई थप तथ्य संकलन गर्ने कार्य जारी राखेको उनले बताए ।
