नवलपरासी — महेन्द्रराजमार्ग अन्तर्गत पूर्वी नवलपरासीको सबैभन्दा लामो दुम्किबासको विनयी खोलामा पक्की पुल ढलान भएको छ ।

निर्माणाधीन महेन्द्रराजमार्गको दुम्किबासमा पर्ने २ सय ४५ मिटर लामो विनयी खालामा शुक्रबार साँझ पक्की पुल ढलान गरिएको हो । राजमार्ग बिस्तारका क्रममा निर्माण गरिएको नयाँ पक्की पुलबाट आउँदो असार १४ गतेबाट यातायात सञ्चालन हुने सडक विभागले जानकारी दिएको छ ।

बुटवल नारायणगढ सडक खण्डका प्रवक्ता शिव खनालका अनुसार ढलान भएको २८ दिनपछि पुलमा यातायात सञ्चालन गर्न मिल्छ । पुल ढलान गरेको २८ दिनपछि मात्र पुलले भारबहन क्षमता अनुसारको काम गर्ने भएकाले असार १४ गतेबाट त्यही नयाँ पुल हुँदै गाडी ओहोरदोहोर गर्न मिल्ने भएको खनालले जानकारी दिए ।

विनयी खोलामा ५२ वर्षअघि निर्माण भएको फलामे पुल ६ महिनाअघि भाँच्चिएका कारण त्यहाँ डाइभर्सन सडकबाट आउजाउ भइरहेको छ ।

पूर्वी नवलपरासीको ६७ किलोमिटर खण्डमा ५ वटा फलामे पुल रहेका छन् । नयाँ निर्माणाधीन सडक अन्तर्गत नयाँ पुल निर्माण भइसकेपछि फलामे पुल विस्थापित हुने छन् ।