बागलुङ — भारतको अयोध्याबाट आएका बालकृष्ण आचार्य बागलुङको शालिग्राम संग्रहालय देखेर दंगै परे । उनले एक-दुईवटा शालिग्राम पुज्ने गरेकामा एकैठाउँ एक लाख १५ हजार शालिग्राम संग्रह गरेको देखेर अचम्मित भएको बताए ।

कालीगण्डकी नदीमा मात्रै पाइने शालिग्राम नदी दोहनले हराइरहेका बेला यहाँ भने संग्रह गरेर राखिएको छ । १ सय ५० मिटर लामो सुरुङभित्र सजाएर राखेको शालिग्राम हेर्न धेरै पर्यटक आउने गरेका छन् । भारतीय पर्यटक पनि यहाँ नियमित आउने गर्छन् । वर्षभरि डेढ लाख पर्यटक भित्रने संग्रहालयमा २० हजारभन्दा बढी भारतीय आउने गरेको व्यवस्थापन समितिको रेकर्ड छ ।

मुक्तिनाथ आएका पर्यटकमध्ये गाडी चढेर आउनेहरु धेरैजसो आएको संग्रहालयका संरक्षक ऋषि प्रपन्नाचार्यले बताए । ६ वर्षअघि संग्रहालय स्थापना गरिएको  हो । भारतीय पर्यटकले बागलुङ कालिका र शालिग्रामको दर्शन गर्न चाहेको उनको भनाइ छ । उनका अनुसार समूहमा आएका पर्यटकलाई यहाँ भोजन र बस्ने व्यवस्थापनसमेत गरिएको छ । ७ देखि १० दिनको प्याकेज बनाएर घुम्न आउने भारतीय पर्यटकले एक दिनका लागि संग्रहालय र बागलुङ कालिका मन्दिरलाई गन्तव्य बनाउने गर्छन् ।

भारतको मायापुरबाट आएका माधव हरिदासले शालिग्राम संग्रहालय घुम्दा शान्ति मिलेको बताए । उनले संसारभर घुमेर पनि एक लाख शालिग्राम एकै स्थानमा दर्शन गर्न नपाएको भन्दै यो अवसर यहाँ आएर मिलेको बताए । भारतको केरला, आन्ध्र प्रदेश, गुजरात लगायतका स्थानबाट बढी भारतीय आउने गरेका हुन् ।

यो संग्रहालयका लागि सुरुङ निर्माणमा नेपाली सेनाले सहयोग गरेको थियो । संग्रहालयभित्र कालीगण्डकी नदीमा पाइनेबाहेक विभिन्न समुद्रमा पाइने सिपी र अन्य चट्टानको नमुना पनि संग्रह गरिएको छ । सुरुङभित्रै कालीगण्डकी नदी सभ्यता पनि बनाइएको छ । दामोदरकुण्डदेखि त्रिवेणीसम्मको ‘टोपोग्राफी’ बनाएर राखेपछि आन्तरिक र बाह्य पर्यटकका लागि यो आर्कषक गन्तव्य बनेको छ ।

‘हामीले पर्यटक भनेका छैनौं, भक्तजनहरु धेरै नै आउनुभएको छ,’ उनले भने, ‘आएका भक्तजनलाई सके एकरात राख्ने, नसके प्रसाद वितरण गरेर मात्रै बिदाइ गर्छौं ।’ संग्रहालयसँगै ७ करोड लागतमा रंगबैंकटेश्वर मुक्तिनारायण मन्दिर पनि बनेको छ । कलात्मक मन्दिर हेर्नका लागि समेत धेरै पर्यटक पुग्छन् । 

यो संग्रहालयभित्र छिर्न बाघको मुखाकृति बनाइएको छ । त्यसले पनि धेरैको ध्यान खिचेको हो । ‘बागलुङको पहिचान भएका केही तथ्यमध्ये बाघको पनि इतिहास देखियो, त्यसैले हामीले  मुखाकृति बनाएका हौं,’ ऋषि प्रपन्नाचार्यले भने, ‘यो साहसको प्रतीक पनि हो ।’ यहाँ मुक्तिनाथ वेद विद्याश्रम पाठशालासमेत सञ्चालनमा छ । धार्मिक यात्रीले यहाँ आएर सबै क्षेत्रको अध्ययन र दर्शनसमेत गर्न पाउँछन् ।

भक्तजनको मागअनुसार नै संग्रहालयमा हालै  ५ दिने शालिग्राम महोत्सव पनि सञ्चालन गरियो । उक्त अवसरमा १ सय ८ रामायण पाठ, शालिग्रामको पूजा र भजनकिर्तनका अभियान सञ्चालन भए ।