गोरखा — गोरखा नगरपालिका-१० छेवेटारस्थित महादेवटारीमा गत वर्ष जेठमा भेटिएका भग्नावशेष १७औं शताब्दीतिर बनेको मन्दिरको भएको अनुमान गरिएको छ । गत जेठमा लट्टेश्वर महादेव मन्दिर पुनर्निर्माणका लागि जग खन्ने क्रममा पुरानो इँट्टासहितको संरचनाको भग्नावशेष भेटिएको थियो ।

इँटा र पुरानो संरचनाको गाह्रोसहितको भग्नावशेष भेटिएपछि काम रोकेर महादेवस्थन संरक्षण तथा विकास समितिले पुरातत्व विभागलाई जानकारी गराएको थियो । 

पुरात्व विभागको टोलीले १० दिन लगाएर भग्नावशेषको अध्ययन गरिरहेको छ । १७ औं वा १८ औं शताब्दीमा बनेको मन्दिरको भग्नावशेष रहेको प्रारभ्भिक अध्ययनले देखाएको पुरात्व विभागबाट अध्ययनमा आएका नवराज अधिकारीले बताए ।

‘पुरातात्विक महत्त्व राख्ने भग्नावशेष हो, जग हेर्दा ७० सेन्टिमिटर गाह्रोको चौडा छ,’ उनले भने,‘दुई तलाको मन्दिर हुनुपर्छ भन्ने हाम्रो अनुमान हो, यसै क्षेत्रको राम मन्दिर भएतर्फ पनि संरचनाको केही भाग घुसेको देखिन्छ, ती गारोका भागहरू पनि उत्खनन् गरेर अध्ययन गरेपछि संरचनाको वारेमा अझै धेरै कुरा थाहा हुन्छ ।’ 

गत वर्ष जेठमा लट्टेश्वर महादेवको मन्दिर पुनर्निर्माणका लागि जग खन्ने क्रममा दक्षिण पूर्वी भागमा रहेको पिपलको जरा उप्काउने क्रममा वर्षौं पुराना इँटा भेटिएका थिए । पिपलको जरामा इँटा र मन्दिर पुनर्निर्माणका लागि जग खन्ने क्रममा गारोसहितको पुरानो भग्नावशेष भेटिएपछि पुरातत्व विभागले अध्ययन थालेको हो । अध्ययन अझै बाँकी रहेको अधिकारीले बताए ।

‘ढुङ्गा अलि कम, इँटा र झिँगटीको छाना भएको माटोको जोडाइबाट बनेको मन्दिर हुन सक्छ, केही झिँगटीका टुक्रा पनि फेला परेका छौं,’ उनले भने,‘विस्तृत अध्ययनबिना अहिले नै यकिन गर्न भने सकिँदैन ।’