गोरखा — चुमनुव्री गाउँपालिका–१ सामागाउँमा पर्यटन तथा वन पैदावार चेकपोस्ट पुन: संचालनमा आएको छ । कोरोना महामारीका कारण बन्द भएको चेकपोस्ट मनास्लु दिवसको दिन वैशाख २६ गतेबाट पुन: सञ्चालनमा ल्याइएको हो ।
मनास्लु क्षेत्र आउने पर्यटकको संख्यामा उल्लेखनीय वृद्धि भइरहेकाले पर्यटकको सुविधालाई ध्यानमा राखेर पर्यटक जाँच केन्द्रको सेवा पुन: सुरु गरिएको मनास्लु संरक्षण क्षेत्र(एमक्याप)का प्रमुख सन्तोष शेरचनले बताए । जाँच केन्द्रबाट पर्यटकलाई ट्रेकिङ रुटका बारेमा जानकारी दिने, पर्यटकीय क्षेत्रका बारेमा सूचना प्रवाह गर्ने, पर्यटन अनुमतिपत्रको जाँच गर्नेलगायतका कार्य हुने उनले बताए ।
जडिबुटी संकलनका बेला अनुमगमन तथा वन्यजन्तबाट घरपालुवा जनावरलाई क्षति गरे अनुगमन तथा राहतका लागि आवश्यक कागजात संकलनका लागि सहजीकरण सेवा पनि केन्द्रबाट प्रवाह हुने उनले बताए । ‘सामागाउँ मुख्य ठाउँ पनि हो, मनाङ तर्फबाट लार्केपास गरेर गोरखा प्रवेश गर्नेहरुको परमिट चेकिङमा पनि सहज बन्छ,’ उनले भने ।
यसअघि एमक्यापले चुमनुव्री–३ जगतमा पर्यटक जाँच केन्द्र सञ्चालनमा ल्याएको थियो । कोरोनाका महामारीका बेला जगत र सामागाउँको पर्यटन जाँच केन्द्र बन्द हुँदा चुमनुव्री–३ सिर्दिवासस्थित फिलिममा रहेको एमक्यापको कार्यालयबाट उत्त सेवा प्रवाह हुँदै आएको थियो ।
