नवलपुर — रोजगारीको सिलसिलामा पोर्चुगल गएका पूर्वी नवलपरासीको कावासोती १६ डन्डाका एक युवकको मृत्यु भएको छ । २५ वर्षका विजय परियारको उपचारका क्रममा अस्पतालमा मृत्यु भएको पारिवारिक स्रोतले जनाएको छ । सन् २०२१ मा श्रम स्वीकृति गरेर क्रोसिया गएका परियार तीन महिनापछि पोर्चुगल छिरेका थिए ।

चार वर्षसम्म पोर्चुगलको एक कृषि फर्ममा काम गर्दै आएका परियारको उपचारको क्रममा वैशाख ११ गते मृत्युको खबर आएको मृतक परियारका बुबा निमबहादुर परियारले बताए । 

छोराको मृत्युले शोकमग्न भएका परिवारले शव नेपाल ल्याइदिन सरकार र पोर्चुगलमा रहेका नेपाली समाजलाई आग्रह गरेका छन् । ‘छोरो बिरामी थियो भन्ने थाहा थियो, सन्चो हुन्छ चिन्ता नलिनु बुबा भन्थ्यो, ’ उनले भने, ‘बुधबारसम्म फोनमा कुरा गरेको छोरोको बिहीबार मृत्युको खबर आयो । छोराको मुख हेर्न मन छ । जसरी भएपनि शव नेपाल ल्याइदिन सबैले सहयोग गर्नुहुन आग्रह गर्दछु ।’