वार्षिकोत्सव समारोहमा बोल्दै सूचना तथा सञ्चारमन्त्री पृथ्वीसुब्बा गुरुङले खजे दुरालाई राष्ट्रिय विभूति घोषणा गर्न आफ्नोतर्फबाट सक्दो प्रयास गर्ने बताए । उनले तत्कालका लागि दुरा भाषामा समाचार प्रकाशन, प्रसारण गर्नुका साथै लमजुङे ठाडो भाकाका सर्जक देउबहादुर दुराको हुलाक टिकट प्रकाशन गर्ने प्रतिबद्धता जनाए । ‘सरकारले अहिले २५ भाषामा रेडियो नेपालमा समाचार पढ्ने र ४५ भाषामा गोरखापत्रमा समाचार प्रकाशन गर्ने गरिरहेको छ,’ उनले भने, ‘अब २६ औं र ४६ औं भाषा दुरा भाषा बनाउनका लागि तत्कालै निवेदन दिनुहोला ।’ 

दुरा जाति लोपोन्मुख अवस्थामा पुगिरहेको अवस्थामा भाषा र लिपिको विकास गर्दा अस्तित्व जोगिने उनको भनाइ थियो । पछिल्लो समय राजावादीको सक्रियता बढेको सुनाउँदै उनले अल्पसंख्यक जातिका लागि नै संघीयता आएको बताउँदै राजावादीतर्फ नलाग्न समेत अनुरोध गरे । ‘अल्पसंख्यक जातिको संस्कृति जोगाउने संघीयताले नै हो, राजावादीले होइन,’ उनले भने, ‘त्यसैले राजाको पछि नलाग्नुहोला ।’ 

लोपोन्मुख अवस्थामा रहेको जातिको उत्थानका लागि स्वयं सचेत भई आर्थिक तथा सामाजिक सम्मुनतका लागि समेत युवालाई सुरक्षा निकाय, निजामति कर्मचारी बनाउनुपर्नेमा उनको जोड थियो । ‘पुर्खाहरुले पेन्सन पाउन र ब्रिटिस आर्मीमा जानकै लागि गुरुङ लेखाउँदा आफ्नो मौलिक र वास्तविक जाति हटाउन बाध्य भएको विषयमा समेत राज्य गम्भीर छ,’ उनले भने, ‘अब आफ्नै मुल जाति लेखाउन पाउने गरी व्यवस्था गर्न लागेका छौं ।’