‘राष्ट्रका यस्ता नायकहरूलाई पेलेर जाने हो भने कर्मचारीले कुन मनोबलका साथ काम गर्ने ?'
कास्की — नेपाल विद्युत् प्राधिकरणको कार्यकारी निर्देशकबाट कुलमान घिसिङलाई हटाइएकामा गण्डकी प्रदेशसभा सदस्य हरिबहादुर भण्डारीले संसद्मै कालो चस्मा लगाएर विरोध जनाएका छन् । मंगलबारको प्रदेशसभा बैठकमा गण्डकी प्रदेशमा विद्युत् विकास सम्बन्धमा व्यवस्था गर्न बनेको विधेयकको सैद्धान्तिक छलफलमा भाग लिँदै माओवादी सांसद भण्डारीले कालो चस्मा लगाएर विरोध जनाएका हुन् ।
सभामुख कृष्णप्रसाद धितालले बोल्ने समय दिँदा उनले चस्मा लगाएका थिएनन् । रोस्ट्रममा बोल्न सुरु गर्दा गोजीमा रहेको चस्मा लगाए । उनले लोडसेडिङमुक्त नेपालका नायकलाई कारबाही गरेको भन्दै सरकारको आलोचना पनि गरेका थिए ।
प्रधानमन्त्रीलाई आफन्तलाई बाहिर राखेर कुलमानलाई प्राधिकरणको कुर्सीमा बसेको मन नपरेको उनले बताए । उनी बोलिरहँदा सभामुख धितालले विषयमाथि बोल्न सचेत गराए । त्यसपछि सांसद भण्डारी विधेयकउपर छलफलमा अघि बढे ।
सांसद भण्डारीले गण्डकी प्रदेशसभा नियमावली, २०८० को नियम २० र २२ विपरीत गरेको भन्दै एमालेले नियम २५ अनुसार नियमापत्ति जनाएको छ । एमाले प्रमुख सचेतक गोविन्दबहादुर नेपालीले सांसद भण्डारीले नियम २० (घ) र नियम २२ को सम्बद्धताको व्यवस्था उल्लंघन गरेको भन्दै संसद्को रेकर्डबाट उनको सम्बोधन हटाउन माग गरे । नियम २० (घ) मा अशिष्ट, अश्लील, अपमानजनक, आपत्तिजनक शब्द बोल्न नहुने र नियम २२ (१) मा प्रदेशसभामा बोलिरहेको कुरा विचाराधीन विषयसँग सम्बन्धित हुनुपर्ने उल्लेख छ ।
'प्रधानमन्त्रीको सालो' भन्ने शब्द घोर आपत्तिजनक भएको प्रमुख सचेतक नेपालीले जिकिर गरे । ‘प्रधानमन्त्रीको सालो भन्ने शब्द घोर आपत्तिजनक शब्द हो । म चुनौती दिन चाहन्छु, निर्वाचनमा प्रचण्ड कमरेडको नजिकै कुलमान घिसिङको फोटो टाँस्दै हिँड्नुभयो,’ उनले भने, ‘दलगत रूपमा उहाँहरूको नाता, सम्बन्ध के हो ? कुलमान घिसिङ माओवादी केन्द्रको नेता हो ?’
एमालेको नियमापत्तिपछि सभामुख धितालले आफूले सचेत गराएकाले यस विषयमा पछि छलफल गर्ने र बैठक अघि बढाउने वातावरण बनाउन आग्रह गरे । त्यसपछि बैठक अघि बढ्यो ।
सम्मान गर्नुपर्ने व्यक्तिलाई अपमान गरिएपछि आफूले सांकेतिक विरोध गरेको सांसद भण्डारीको भनाइ थियो । ‘राष्ट्रका यस्ता नायकलाई पेलेर जाने हो भने कर्मचारीले कुन मनोबलका साथ काम गर्ने ? जुनसुकै पार्टीमा आस्था राख्ने हुन्, यस्ता मान्छेलाई सम्मान गर्नुपर्नेमा अपमान गरिएको छ । त्यही भएर मैले सांकेतिक विरोध गरेको हुँ,’ उनले कान्तिपुरसँग भने ।
