बागलुङ — नेपाल विद्यार्थी संघ, बागलुङका अध्यक्ष विशेष पराजुलीले राजीनामा दिएका छन् । स्वतन्त्र विद्यार्थी युनियनको निर्वाचनमा पार्टीले हस्तक्षेप गर्दा चरम गुटबन्दीको निर्मम सिकार बन्नुपरेकाले राजीनामा दिएको उनले बताए ।

धौलागिरि बहुमुखी क्याम्पसमा भएको निर्वाचनमा नेविसंघबाट सभापति पदकी उमेदवार सृष्टि आचार्य पराजित भएकी छन् । सभापतिमा अनेरास्वियुकी आस्मिन शेख विजयी भइन् । 

नेविसंघबाट दीपक सुवेदी बागी उठेका थिए । उनले ७ मत ल्याएका थिए भने नेविसंघमै आबद्ध भए पनि स्वतन्त्र समूहका रुपमा उठेकाले १ सय २२ मत ल्याएका थिए । आचार्य ६१ मतले पराजित भएकी थिइन् । सुवेदीले समय सकिएपछि मात्रै 'मिडप्याक' गरेका थिए । 

निर्वाचनमा अनेरास्वियुले एक सदस्य मात्रै जितेको छ भने अन्य सबै पदमा नेविसंघका उमेदवार विजयी भए । उमेदवार छनोट प्रक्रियाबाटै पार्टीले हस्तक्षेप गरेको पराजुलीको आरोप छ । 

राजीनामापत्रमा पराजुलीले लोकतन्त्र हार स्वीकार गर्ने व्यवस्था भएकाले हारलाई सहर्ष स्वीकार गरेर जित्ने उमेदवारलाई रचनात्मक सहयोग गर्ने प्रतिबद्धता जनाएका छन् । 'पार्टी नेतृत्वको अलोकतान्त्रिक, अराजनीतिक र गैरजिम्मेवार चरित्रका कारण हामीले आफ्नै संघर्षको इतिहासलाई न्याय गर्न सकेनौं,’ उनले भनेका छन्, ‘कर्तव्य पालना गरेर पनि परिणाम दिन नसकेपछि हारको नैतिक जिम्मेवारी लिएर राजीनामा गर्दछु ।’