कास्की — मतपत्रमा भएको त्रुटिका कारण स्थगित पृथ्वीनारायण क्याम्पसको स्वतन्त्र विद्यार्थी युनियन (स्ववियु)को निर्वाचनको नयाँ मिति तोकिएको छ ।

मंगलबार स्थगित भएको निर्वाचन चैत १० आइतबार बिहान ८ देखि दिउँसो ४ बजेसम्म गर्ने संघ-संगठन, प्यानल र स्वतन्त्र उम्मेदवारबीच सहमति जुटेको निर्वाचन समितिले बुधबार सूचनामार्फत जानकारी दिएको छ । निर्वाचनका लागि चैत ७ मध्यराति १२ बजेदेखि सुरु हुने निर्वाचन अधिकृत प्रा. डा. रामचन्द्र पोखरेलले जानकारी दिए ।

मतपत्रमा प्रत्यक्षतर्फ अनेरास्ववियु (छैठौं)बाट अध्यक्ष पदका उम्मेदवार रहेका मिलन सुनारको नाममा कोष्ठक छुटेपछि मंगलबार निर्वाचन हुन सकेको थिएन । नयाँ मतपत्र प्रकाशनपछि निर्वाचन समितिले बुधबार बिहान ८ बजेदेखि सुरु हुने गरेर मतदान स्थगित गरेको थियो । तर, असन्तुष्ट पक्षले मंगलबार नै ताला लगाएपछि बुधबार मतदान हुन पाएन । बुधबार साँझ बसेको निर्वाचन समिति र संगठन, स्वतन्त्र उम्मेदवारबीचको संयुक्त बैठकमा नयाँ मिति तोक्ने सहमति जुटेको हो ।

अखिल (छैठौं)बाट अध्यक्ष पदका उम्मेदवार रहेका सुनारले आफूहरुलाई पेल्ने काम भएको बताए । क्याम्पसले नयाँ मिति तोकेकोमा आफ्नो संगठनको कुनै सहमति नरहेको उनको भनाइ छ । `सबै संघ-संगठनको सहमति भनिएको छ । तर नयाँ शक्ति विद्यार्थी युनियन र हाम्रो सहमति छैन,´ उनले भने, `ठूलो संगठन भनेकाले फोडेको भए हामीलाई थाहा छैन ।´