नगर प्रमुख आचार्यले हरित रोजगारी सिर्जनासँगै चक्रिय अर्थतन्त्रको निर्माणमा परियोजनाले महत्त्वपूर्ण योगदान गर्ने विश्वास व्यक्त गरे । फोहोरमैला व्यवस्थापन निकै चुनौती बनिरहँदा मोहोरमा बदल्ने योजनाले सामुदायिक सशक्तिकरणमा भूमिका खेल्ने उनको भनाइ छ । पुनः प्रयोगमा आउने फोहोर १ सय ३६ वटा समूहमार्फत सामग्री निर्माण गरी सशक्तीकरणसँग जोडिने प्रमुख आचार्यले बताए । परियोजनाको पहिलो चरणमा ३ हजारभन्दा बढी प्रत्यक्ष/अप्रत्यक्ष रोजगारी सिर्जना हुने उनको दाबी छ । 

कोइका नेपालका कन्ट्री डाइरेक्टर मोहेन कोङले पर्यटकीय राजधानीमा रिसाइकल र अपसाइकलमार्फत् हरित रोजगारी सृजनालाई नमुनाका रूपमा विकास गर्न यो परियोजना कोसेढुंगा साबित हुने जिकिर गरे । हरित रोजगारी सिर्जना संसारभर निकै प्रभावकारी परियोजनाका रूपमा अगाडी आएको कोङको भनाइ छ । 

संयुक्त राष्ट्र विकास कार्यक्रम (यूएनडीपी) का एसिया क्षेत्रीय निर्देशक क्रिस्टोफर बहाइटले परियोजनाले उद्यमीको क्षमता विकास गरी हरित रोजगारी सिर्जना गर्न सहयोग गर्ने बताए । परियोजनामार्फत ग्रीन भेन्चर जोन (जीभीजेड) स्थापना गरी वित्तीय, प्राविधिक र बजार सहायता प्रदान गरिने उनले सुनाए ।