पोखरा — गण्डकी प्रदेशका मुख्यमन्त्री सुरेन्द्रराज पाण्डे र यूएनडीपीका एसिया तथा प्रशान्त क्षेत्रका उपक्षेत्रीय निर्देशक क्रिस्टोफ बहुयेटबीच सोमबार भेटवार्ता भएको छ । भेटमा मुख्यमन्त्री पाण्डेले सशक्तीकरणको क्षेत्रमा प्रदेश र स्थानीय तहलाई यूएनडीपीले गर्दै आएको सहयोग प्रभावकारी रहेको बताए । 

यूएनडीपीले दिगो विकास, फोहोरमैला व्यवस्थापन, नवप्रवर्तन, उद्यमशीलताको क्षेत्रमा गण्डकी प्रदेश भित्र गर्दै आएको सहयोगको प्रशंसा गर्दै उनले भने,  ‘पूर्वाधार, स्वास्थ्य, शिक्षा, पर्यटन, कृषि, जलवायू परिर्वतन लगायत प्रदेशको प्राथमिकताका क्षेत्रमा यूएनडीपीसँग सहकार्य गर्न हामी तयार छौं ।’ यी क्षेत्रमा सहकार्य गर्दा प्रदेश सरकारले लिएको नीति अनुसार युवा पलायन रोक्न, रोजगारी सिर्जना गर्न, बाँझो जमिनमा खेती बिस्तार गर्न र उद्यमशीलता प्रवर्द्धनमा सहयोग पुग्ने उनले बताए । गण्डकी प्रदेश सरकारले दोस्रो पञ्चवर्षीय योजनामा आफ्ना प्राथमिकताको क्षेत्र पहिचान गरेकाले उक्त क्षेत्रमा सहकार्य हुँदा प्रदेशवासीले ठूलो उपलब्धी हासिल गर्न सक्ने उनले बताए । 

निर्देशक क्रिस्टोफले गण्डकी प्रदेश सरकारसँगको भेट नेपालको पहिलो औपचारीक कार्यक्रम भएको बताउँदै भने सहकार्य गर्न पाएकोमा खुसी व्यक्त गरे । प्रादेशिक तथा स्थानीय शासन सहायता कार्यक्रम (पीएलजीएसपी) अन्तर्गत कार्यान्वयन भएका कार्यक्रमको प्रभावकारिताका बारेमा पनि उनले चासो राखेका थिए ।