शिवजीखोला कृषक समूहले यसपाला ‘सेजिटा’ जातको आलु नमुनाका रुपमा लगाएको थियो । कृषि ज्ञान केन्द्रले चालु वर्षमा बीउ मात्रै उत्पादन गर्नका लागि बिहादी-१ को सिर्जनशील कृषक समूह, वडा नम्बर ४ को आत्मनिर्भर कृषि समूह र वडा नम्बर ५ को शिवजीखोला कृषक समूहमा ‘सेजिटा’ आलु लगाइएको हो । ज्ञान केन्द्रका अनुसार यो आलुबाट ‘आलु चिप्स’ र ‘फ्रेन्स फ्राई’ बनाउन सकिन्छ । 

ज्ञान केन्द्रका प्रमुख परशुराम अधिकारीले पर्वतमा चालु आर्थिक वर्षमा मात्रै ६१ कृषक समूहका १ हजार ३ सय हेक्टर जमिनमा आलु खेती गर्न किसानलाई बीउ र प्रविधिमा अनुदान दिएको बताए । यसपाला २६ हजार मेट्रिकटन आलु बजार पठाउन सकिने लक्ष्य राखिएको बताउँदै उनले भने, ‘हामीले किसानलाई बीउमा ७० प्रतिशत र प्रविधिमा ५० प्रतिशत अनुदान दिएका छौं । सिँचाइको व्यवस्थापन गर्नु परेमा ७० प्रतिशत अनुदान सहयोग गरेका छौं ।’ 

आलु उत्पादन बढाउन मात्रै केन्द्रले पर्वतमा मात्रै २ करोड रुपैयाँ खर्चेको छ । ज्ञान केन्द्रका प्रमुख अधिकारीले किसानको उत्पादनलाई बुटवल र स्याङ्जासम्मका व्यवसायीले किन्न खोजिरहेको बताए ।

कृषि प्राविधिक ऋषिराम भुसालले उत्पादन बढे पनि बजारमा समस्या नहुने बताए । उनले भने, ‘किसानले उचित मूल्य समेत पाउने अवस्था बन्दै छ ।’