लमजुङ — हिमाली जिल्ला मनाङको चामे गाउँपालिका-१ तिमाङ गाउँ माथिको जंगलमा फैलिएको डढेलो नियन्त्रणमा आउन सकेको छैन ।

नेपाली सेना, नेपाल प्रहरी, सशस्त्र प्रहरी, अन्नपूर्ण संरक्षण क्षेत्र आयोजना, डिभिजन वन कार्यालयका कर्मचारी साथै स्थानीयवासीले नियन्त्रणमा लिने प्रयास गरे पनि सफल हुन सकेको छैन ।

माघ १९ गतेदेखि जंगलमा फैलिएको डढेलो १० दिनसम्म नियन्त्रणमा आउन नसकेको प्रमुख जिल्ला अधिकारी मातृका आचार्यले बताए । उनका अनुसार केही दिनअघि डढेलो नियन्त्रणमा आएजस्तो थियो । फेरी बल्झिएको उनले बताए । उनका अनुसार सोमबार पनि सुरक्षाकर्मी, एक्याप, वनका कर्मचारी साथै स्थानीयवासी आगो नियन्त्रणका लागि जंगलतर्फ लागेका छन् ।

वडाध्यक्ष खड्गबहादुर गुरुङले हिउँ नपर्दा जमिन पुरै सुख्खा रहेको र डढेलो फैलिएको बताए । करिब ३ हजार मिटर उचाइको उक्त क्षेत्रका फैलिएको डढेलो नियन्त्रणमा आउन नसकेको अन्नपूर्ण संरक्षण क्षेत्र आयोजना (ए क्याप) मनाङका प्रमुख ढकबहादुर भुजेलले बताए । उनका अनुसार साँझपख मौसम चिसिँदै गएपछि आगो नदेखिने र दिउँसो ११ बजेपछि हावाहुरी चल्ने भएकाले आगो बल्झिने गरेको छ । डढेलोका कारण रुख बिरुवा, जडीबुटी, चराचुरुङ्गीका गुँड, बासस्थानहरु नास भएको उनले बताए ।