हस्तकला उपजतर्फ डोको, नाम्लो, दुनाटपरी, डोको, नाम्लोलगायतका वस्तुहरू राखिनेछ । कृषि उत्पादनतर्फ काउली, बन्दा, आलु, लसुन, गोलभेडा, काउली, डल्ले खुर्सानीलगायत राखिनेछ । खाद्यान्नतर्फ चामल, कागुनो, कोदो, मकैको पिठो, मास, दाललगायत राखिने हाटबजार सञ्चालन समितिका अध्यक्ष भीष्मकान्त कुइँकेलले बताए । 

यस्तै, भीरमह, घरमहसमेत बिक्री गरिने उनले बताए । कृषक आफैंले कृषि उत्पादन बिक्री गर्न सक्ने भएकाले कृषक र उपभोक्ता दुवैलाई सहज हुने उनले बताए । कृषि उपज तथा पशु उत्पादनका उपभोग्य वस्तुको यसअघि नै गाउँपालिकाले न्यूनतम समर्थन मूल्य निर्धारण गरिसकेको छ ।

स्थानीय कृषि उत्पादनलाई बढावा दिन र बाह्य क्षेत्रबाट कृषि उपजको आपूर्ति न्यूनीकरण गर्न गाउँपालिकाले गाउँपालिका केन्द्रनजिकै खुदीमा नियमित रूपमा हाटबजार सञ्चालन गर्न लागेको जनाएको छ । प्रमुख प्रशासकीय अधिकृत अर्जुन चपाईंले ग्रामीण कृषिजन्य उत्पादनलाई बजारीकरण गर्न र गाउँपालिकाका किसानलाई व्यावसायिक उत्पादनमा जोड्न नियमित रूपमा हाटबजार सञ्चालन गर्न लागिएको बताए ।