गोरखा — गण्डकी गाउँपालिकाको केन्द्र वडा नम्बर ६ स्थित वनटारमा राख्ने गाउँसभाले निर्णय गरेको छ । शुक्रबार भएको १७ औं गाउँसभामा पालिकाको केन्द्रबारे मतदान भएको थियो । मतदानमा गाउँपालिकाको प्रशासकीय भवन वनटारमा राख्ने निर्णयको पक्षमा दुई तिहाई मत परेको गाउँपालिका अध्यक्ष दिपक तिमल्सिनाले बताए  ।

 ‘कायम रहेको सभा सदस्य संख्यामध्ये दुई तिहाई मत पक्षमा आयो, विपक्षमा शून्य मत प्राप्त भयो,’ उनले भने ।

दुई तिहाई मतले प्रशासकीय भवन वनटारमा कायम गर्ने पारित गरिएको अध्यक्ष तिमल्सिनाले बताए । शुक्रबारको गाउँसभा कांग्रेस एमालेबाट निर्वाचित जनप्रतिनिधिले भने बहिष्कार गरेका थिए ।

अघिल्लो कार्यकालदेखि नै गण्डकी गाउँपालिकाको केन्द्रबारे विवाद हुँदै आएको छ । साविकको गाविस भवन (ओखलडाँडा)बाट प्रवाह हुँदै आएको सेवा २०७९ मा निर्वाचित भएलगत्तै वनटारमा सारेर सेवा केन्द्रमार्फत सेवा प्रवाह हुँदै आएको थियो । ‘पहिलो कार्यकालमा पनि ओखलडाँडामा केन्द्र राख्ने नियमसम्मत थिएन,’ अध्यक्ष तिमल्सिनाले भने,‘केन्द्र सार्ने निर्वाचनको एजेण्डा पनि थियो, फुजेल, घ्याल्चोक, दर्वुङ लगायतका क्षेत्रका बासिन्दालाई पायक पर्ने गरी वनटारमा केन्द्र बनाएका हौं, यहाँ केन्द्र राख्न धेरै साथीहरुले समर्थन जनाउनुभएको छ ।’