तनहुँ — ग्रामीण क्षेत्रका विद्यार्थीहरूको शैक्षिकस्तर सुधारका लागि भन्दै तनहुँको आँबुखैरेनी गाउँपालिकाले छात्रावास सञ्चालनमा ल्याएको छ । यहाँको वडा नं. ५ र ६ को ग्रामीण क्षेत्रका विद्यालयहरूमा विद्यार्थी संख्या घट्दै गएपछि एकीकृत ढंगले पठनपाठन सञ्चालन गर्ने उद्देश्यले गाउँपालिकाले छात्रावास सञ्चालनमा ल्याएको हो ।

तनहुँको आँबुखैरेनी गाउँपालिका–६ हिलेखर्कस्थित कन्यादेवी माध्यमिक विद्यालयमा छात्रावास भवन तयार गरी ५० जना क्षमताको छात्रावास सञ्चालन ल्याइएको छ । राष्ट्रपति शैक्षिक सुधार कार्यक्रममार्फत प्राप्त ३६ लाख रुपैयाँ, अपुरो भवन निर्माणका लागि गाउँपालिकाबाट प्राप्त २५ लाख रुपैयाँ र सामाजिक विकास कार्यालयबाट प्राप्त ५ लाख रुपैयाँबाट भवन निर्माण तथा छात्रावासका लागि आवश्यक पूर्वाधार तयार गरिएको विद्यालयका प्रधानाध्यापक सूर्यमान गुरुङले बताए ।

गाउँपालिकाका अध्यक्ष शुक्र चुमानले छात्राबास भवनको उद्घाटन गर्दै न्यून विद्यार्थी संख्या भएका विद्यालयका विद्यार्थीलाई समायोजन गरी पठनपाठनमा सहज बनाउने उद्देश्यले छात्राबास संचालनमा ल्याएको बताए । 

उनले भने, ‘हिउँद सुरु भएपछि यस क्षेत्रका विद्यार्थीहरूलाई विद्यालयबाट ओहोरदोहोर गर्न टाढा भएकाले विद्यालयवरपर डेरा लिएर बसेका रहेछन् । व्यवस्थापकीय र आर्थिक हिसाबले अभिभावकलाई मार परेको र अभिभावकबाट टाढा, कसैको नियन्त्रणमा नहुँदा विद्यार्थीको पढाइमा सुधार नभएको हुँदा शैक्षिक गुणस्तर वृद्धि र बसाइँ व्यवस्थापनका लागि विद्यालयमै निःशुल्क छात्राबास व्यवस्थापन गरिएको हो ।’

वडा नम्बर ५ र ६ मा छरिएको बस्ती छ । विद्यार्थीलाई विद्यालय आउजाउ गर्न डेढदेखि २ घण्टा लाग्छ । यसकारण उनीहरू विद्यालयवरपर महिनाको ५ देखि १० हजार रुपैयाँ खर्चिएर बस्न बाध्य थिए । 

यस्तै ग्रामीण क्षेत्रका विद्यार्थीहरूको शैक्षिकस्तर सुधारका लागि छात्रावास कार्यक्रम महत्त्वपूर्ण पहल भएको र छात्रावासलाई व्यवस्थित रूपमा सञ्चालनमा गाउँपालिकाले आवश्यक सम्पूर्ण सहयोग उपलब्ध गराउँछ र यसका लागि सबै पक्षको सकारात्मक पहल र सहकार्यको आवश्यकता रहेको अध्यक्ष चुमानले बताए । उनले भने, ‘छात्रावासमा शिक्षक पनि सँगै बस्ने हुँदा बिहान बेलुकाको पढाइमा पनि सहयोग पुग्ने आशा लिएका छौं ।’

विद्यालयमा छात्राबास कार्यक्रमको सुरुआतसँगै कक्षा ८, ९ र १० का ४५ जना विद्यार्थीहरू छात्राबासमा बसेर अध्ययन गर्न थालेका छन् । कार्यक्रमको मुख्य उद्देश्य दुर्गम क्षेत्रका विद्यार्थीहरूलाई शिक्षा प्राप्तिमा सहजता पुर्‍याउने र सार्वजनिक विद्यालयको शैक्षिक गुणस्तरमा सुधार ल्याउनु रहेको अध्यक्ष चुमानले बताए । उनले भने, ‘गाउँसभाबाट छात्रावास व्यवस्थापनमा १० लाख रुपैयाँ विनियोजन भएको छ । चैतसम्मको अवस्था हेरेर थप व्यवस्थापन गर्ने छौं ।’