भोट हाल्न गाउँ फर्किनेको लर्को - प्रतिनिधि / प्रदेशसभा निर्वाचन २०७९ - कान्तिपुर समाचार
कान्तिपुर वेबसाईट
AdvertisementAdvertisement

भोट हाल्न गाउँ फर्किनेको लर्को 

डीबी बुढा

जुम्ला — मंसिर ४ गते हुन लागेको प्रतिनिधिसभा तथा प्रदेशसभा निर्वाचनका लागि मतदान गर्न मतदाता गाउँ फर्किन थालेका छन् । सुर्खेत,नेपालगञ्ज र जुम्ला बसपार्कमा मतदाताहरूको लर्को लाग्ने गरेको छ । पाँच वर्षमा एक पटक आउने आम निर्वाचनमा आफूले चाहेको व्यक्ति चुन्न र जिल्लाको समग्र विकासमा टेवा पुगोस् भन्ने हेतुले गाउँ छाडेका मतदाता फर्किन थालेका हुन् । 

मतदान गर्न दुई दिन बाँकी रहँदा जुम्ला आउने मतदाताको संख्या निकै बढेको छ । तिहार मनाइसकेपछि व्यापार तथा कामको सिलसिलामा कालापहाड तथा देशभित्रै रहेका जुम्लावासी आउने क्रम सुरु भएको छ । तिला–९ का नवराज बुढा मतदान गर्नका लागि मतदाता आउने क्रम बढेको बताउँछन् । सहरलाई अस्थायी बासस्थान बनाएर व्यापार व्यवसाय गरेका मतदाता गाउँ फर्किरहेको उनले बताए ।

उम्मेदवारहरूले पनि आफूनिकटका मतदातालाई जिल्ला फर्किन दबाब दिइरहेका छन् । दसैं तिहारसँगै सुनसान गाउँमा चहल पहल बढेको छ । जुम्ला बजारमै व्यवसाय गर्ने,अध्ययन अध्यापन गर्नेदेखि अन्य कामको सिलसिलामा बस्नेहरू मतदान गर्नकै लागि उत्साहित हुँदै फर्किरहेका यातायात व्यवसायीहरूले बताएका छन् ।

‘हामी आफ्नो मताधिकारको प्रयोग गर्न र आफूले रोजेको उम्मेदवार जिताउन गाउँ फर्क‌ंदै छौं,’ सुर्खेतदेखि जुम्ला आउँदै गरेका उमेश उपाध्यायले भने,‘यो पटकको भोट काम गर्नेलाई र सुख दु:खलाई साथ दिने नेतालाई नै जान्छ । जसका लागि हजारौं रुपैयाँ खर्चेर गाउँ फर्केका हौं ।’

पछिल्लो समय जुम्लाको बसपार्कमा यात्रुहरूको निकै भीडभाड लाग्ने गरेको छ । १० वर्षदेखि खलंगामा बसिरहेका जुम्लाका झक्तबहादुर बुढा मतदान गर्न घर फर्कन लागेको बताउँछन् । ‘सबै परिवार मतदान गर्नकै लागि गाउ‘ गयौं,’ उनले भने,‘चुनावमा गाउ‘ फर्किन दबाब पनि आयो । मताधिकारको सदुपयोग गर्न पनि हामी फर्कियौं ।’

प्रतिनिधिसभा र प्रदेशसभा निर्वाचनका लागि जुम्लामा कुल ६८ हजार ६ सय ३८ मतदाता छन् । प्रदेशसभा सदस्य निर्वाचन क्षेत्र १ मा जम्मा ३६ हजार सात सय ८३ मतदाता छन् भने क्षेत्र नम्बर २ मा ३१ हजार ८ सय ५५ मतदाता छन् । निर्वाचनमा जुम्लामा १ हजार ९ सय ५४ जना सुरक्षाकर्मीहरु खटिएका छन् । ८ सय ४३ म्यादी प्रहरी, २ सय २६ नेपाल प्रहरी,४ सय ५० नेपाली सेना, र २ सय ३५ सशस्त्र प्रहरी परिचालन गरिएको मुख्य निर्वाचन अधिकृतको कार्यालय जुम्लाले जनाएको छ ।

जुम्लामा १ सय ६ मतदान केन्द्र छन् । अस्थायी मतदान केन्द्र २ र ८६ मतदान स्थल छन् । निर्वाचनका लागि ८ सय ४८ कर्मचारी खटिएको मुख्य निर्वाचन अधिकृतको कार्यालयले जानकारी दिएको छ ।

प्रकाशित : मंसिर २, २०७९ १६:१९
प्रतिक्रिया
पठाउनुहोस्

‘लुम्बिनी राष्ट्रिय महोत्सव’ मंसिर २३ देखि

माधव ढुंगाना

भैरहवा — चार वर्षपछि सिद्धार्थ उद्योग वाणिज्य संघले आगामी मंसिर २३ देखि पुस ४ गतेसम्म भैरहवामा ‘लुम्बिनी राष्ट्रिय महोत्सव २०७९’ को आयोजना गरेको छ ।


‘पर्यटन, कृषि र उद्योगको बृहत्तर विकास, राष्ट्रिय समृद्धिको आधार’ भन्ने मूल नाराका साथ आयोजना गरिएको आठौं महोत्सवमा स्वदेशी तथा गुणस्तरीय वस्तु तथा सेवाको बजार प्रवर्द्धन गरिने बताइएको छ ।

साथै घरेलु सामग्रीप्रति उपभोक्तालाई जागरुक बनाइ स्थानीय स्तरमा उत्पादित घरेलु तथा हस्तकला सामग्रीको बजार प्रवर्द्धनलाई महोत्सवले प्राथमिकता दिएको शुक्रबार आयोजित पत्रकार सम्मेलनमा जनाइएको छ ।

सिद्धार्थ उद्योग वाणिज्य संघका अध्यक्ष भिष्म न्यौपानेले मुलुक आर्थिक मन्दीले गुज्रिरहेको अवस्था भए पनि केही हदसम्म बजार चलायमान गराउन महोत्सवको आयोजना गरिएको बताए । ‘महोत्सवको माध्यमबाट स्थानीय स्तरमा छिरलिएर रहेका साना पूँजीलाई सकंलन गरी बजारमा ल्याइ आर्थिक तरलताको समस्या कम गर्नु महोत्सवको उद्देश्य हो,’ न्यौपानेले भने ।

उनका अनुसार रुपन्देहीका विभिन्न पालिकाहरूसँगको सहकार्य र समन्वयमा आयोजवना गरिएको यो महोत्सवमा करिब २ लाख ५० हजार दर्शकले अवलोकन गर्ने र महोत्सव अवधिमा १० करोड रुपैयाँ बराबरको कारोवार हुने आकलन गरिएको छ । महोत्सवमा २ सय ५० वटा स्टल रहने बताइएको छ।

भैरहवामा आयोजना गरिने यस्तो महोत्सवबाट आन्तरिक तथा बाह्य पर्यटक आगमनमा वृद्धि हुने, सीमावर्ती भारतीय सहरबाट पनि सहभागिता हुने हुँदा पर्यटन प्रवर्द्धन एवम् आर्थिक गतिविधि चलायमान हुने विश्वास लिइएको अध्यक्ष न्यौपानेले बताए । ‘महोत्सवमा गौतम बुद्धको जन्मस्थल लुम्बिनी र बुद्धसँग सम्बन्धित कपिलबस्तुको तिलौराकोट लगायत पुरातात्विक स्थल र नवलपरासीमा रहेको रामग्राम लगायत क्षेत्रमा विशेष प्याकेज बनाइ भ्रमणको व्यवस्था गरिएको छ,’ न्यौपानेले भने, ‘यसबाट पर्यटन क्षेत्रको विकास र प्रवर्द्धनमा सहयोग पुग्नेछ ।’

प्रकाशित : मंसिर २, २०७९ १६:१०
पूरा पढ्नुहोस्
प्रतिक्रिया
पठाउनुहोस्
×