पहिरोका घाइते भन्छन्, ‘बस्ती सारिदेउ भन्दा बेवास्ता गरे, अहिले यस्तो भयो’- फिचर - कान्तिपुर समाचार

पहिरोका घाइते भन्छन्, ‘बस्ती सारिदेउ भन्दा बेवास्ता गरे, अहिले यस्तो भयो’

अनिश तिवारी

सिन्धुपाल्चोक — अविरल वर्षापछि आएको पहिरोले शुक्रबार जुगल गाउँपालिकाको वडा २ गोल्चे लिदिमा १३ घर पुरिए । ३८ जना सम्पर्कविहीन भएको गाउँपालिकाले सूची बनाएर सार्वजनिक गरिसकेको छ । घटनास्थलमा पाँचजनाको शव फेला परेको छ । 

यो बस्तीभरका स्थानीय शोकाकुल बनेर पहिरो हेर्दैछन् । पहिरोबाट बाँचेका पाँचजना गम्भीर घाइतेमध्ये चारजनाको चौतारास्थित अस्पताल र एक जनाको काठमाडौस्थित सिभिल अस्पतालमा उपचार भइरहेको छ । उनीहरुले पहिरोको जोखिममा रहेको थाहा हुँदाहुँदै सरकारले बेवास्ता गरेकाले यस्तो भएको आरोप लगाएका छन् । भूकम्पपछि विज्ञहरुले यो स्थानलाई पनि बस्ती स्थानान्तरण गर्नुपर्ने स्थानका रुपमा औंल्याएका थिए । यसै महिनामा पनि सानो पहिरो आएपछि निवेदन दिएको तर सरकारी निकायले वास्ता नगरेको उनीहरुको भनाई छ । चौतारा अस्पतालमा उपचार गराइरहेका घाइतेको भनाई :

श्रीमानले तानेर बचाए

जुनमाया तामाङ, ३४ वर्ष

ठ्याक्कै ७ बजेको थियो । घरको बुइगलमा कोदो सुकाउन राखेको थिए । पानी पर्लाजस्तो भएपछि कोदो झिक्न गएँ । अचानक ड्याम्म गरेको आवाज आयो । म साह्रै आत्तिएँ । के भएको हो भनेर सोच्नै सकिनँ । घर जोडले हल्लिन थालेपछि भूकम्प आएको सोचेर घरबाट बाहिर निस्कएर भाग्ने बाटो हेरें । माथिबाट पहिरो आएको देखेपछि के गरौं के गरौं भनेर अलमलमा परे । घरमा ठूला ढुंगा र पहिरोले पुरिसकेको रहेछ । म बेहोशजस्तै भएँ ।

घरकै ढुंगाले मेरो आधा शरीर थिचेर दुखेपछि होश आयो । अनि बेस्सरी चिच्याएछु । छेउमै आइपुग्नुभएको श्रीमानले मलाई बल लगाएर तान्नुभयो । बाहिर निकाल्नुभएछ, बल्ल होश आयो, म बाँचें । यहाँ पहिलेदेखि जोखिम थियो । हामीले निवदेन पनि दियौं तर सरकारले केही गरेन । धन्न भागेर बाँचे, नत्र कहाँ हुन्थ्ये कहाँ ?


बस्ती सारिदिनु भनेर निवेदन दियौं, वास्ता गरिएन

पासाङ दोङ, २१ वर्ष

त्यतिखेर घरमा खाना पकाएर खाने तैयारीमा थिए । बिहानको त्यस्तै ७ बजेको होला । गास नहाल्दै घर हल्लिन थाल्यो । काका, ठूलोबा, छोराछोरी, बाजे सबै आत्तिए । म पनि अन्योलमा परें । एकैपटक ग्यार्लम्म गरेर पहिरोले घरको पर्खाल ढालेपछि मेरो सातो गयो । म अरुलाई छिटो निस्कनुस् भन्दै ढोकातर्फ भागें । निस्कने बाटो देखेपछि पुरा शक्ति लगाएर दौडें । खुल्ला ठाउँमा आइपुग्दा हात र खुट्टामा गहिरो चोट लागेकाले दुखिरहेको थियो ।

भूकम्प आएपछि बस्तीहरुको अध्ययन हुँदा हाम्रो ठाउँलाई पहिरोको जोखिममा भएकाले सार्नुपर्ने बस्ती भनेर विज्ञले भनेका थिए । हामीले त्यसैबेला पनि सरकारी निकायलाई भनेका थियौं । यसै महिना साउनमै सानो पहिरो आएपछि वस्ती सारिदिनुस् भनेर भन्यौं । हामीले गएको साउन २३ मा जिल्ला विपद् व्यवस्थापन समिति र गाउँपालिकालाई निवेदन दिएका थियौं । केही गरिएन ।

(उपचारको क्रममा चौतारा अस्पतालमा कुराकानीमा आधारित ।)

प्रकाशित : श्रावण ३०, २०७७ १९:१९
प्रतिक्रिया
पठाउनुहोस्

लिदी पहिरो [अपडेट] : ५ जनाको शव भेटियो, ३८ जना बेपत्ता भएको गाउँपालिकाद्वारा पुष्टि

अनिश तिवारी

सिन्धुपाल्चोक — जुगल गाउँपालिकाको वडा नम्बर २, गोल्चे लिदीमा गएको पहिरोमा १३ घर पुरिँदा ३७ जना बेपत्ता भएको गाउँपालिकाले जनाएको छ । जुगल २, लिदी लामाटोलका ३८ जना स्थानीय बेपत्ता भएको भन्दै जुगल गाउँपालिकाले सूची निकालेको छ ।

लिदी पहिरोमा परी बेपत्ता भएकामध्ये ५ जनाको शव भेटिएको पुष्टि गरे पनि विस्तृत विवरण भने प्राप्त नभएको सिन्धुपाल्चोक प्रहरीका प्रवक्ता डीएसपी माधवप्रसाद काफ्लेले जानकारी दिए । मृत्यु हुनेहरुको सनाखत भएको छैन ।

सभामुख अग्नि सापकोटासँगै पुगेका नेपाली सेनाको टोलीले गम्भीर घाइते भएका पाँच जनाको हेलिकप्टरबाट उद्धार गरेको छ । चार जना चौतारा अस्पताल र एक जनालाई काठमाडौंको सिभिल हस्पिटल पठाइएको डीएसपी काफ्लेले जानकारी दिए ।

शुक्रबार बिहान साढे ६ बजेतिर बस्तीमाथिको डाँडो भासिएपछि १३ घर पूरै पुरिएको र कम्तीमा ३० घरमा आंशिक क्षति पुगेको गाउँपालिकाका योजना अधिकृत रामबाबु नेपालले जानकारी दिए । पहिरोबाट १५ जना भने सकुशल बाहिर निस्कन सफल भएको नेपालले बताए ।

जुगल गाउँपालिकाका अध्यक्ष होमनारायण श्रेष्ठले उपलब्ध गराएको सूचीअनुसार पहिरोमा परी बेपत्ता हुनेहरु निम्नानुसार छन् ।

१.छविलाल दोङ

२.सोमरानी दोङ

३.धनलक्ष्मी दोङ

४.शिरमाया दोङ

५.विवरानी दोङ

६.साहिँली दोङ

७.बिबी लक्ष्मी दोङ

८.सानुकान्छा दोङ

९.साङलामो दोङ

१०सोनाम दोङ

११.हिरा भक्ति दोङ

१२.जीते झाँक्री दोङ

१३.सानुकान्छी दोङ (गर्भवती)

१४.दिन्दुस दोङ

१५.सुरज दोङ

१६.करेसमाई दोङ

१७.च्यामा दोङ

१८.सानु दोङ

१९.टीकामाया दोङ

२०.छिरिङ दोङ

२१.मानबहादुर दोङ

२२.जयबहादुर दोङ

२३.प्रिया दोङ

२४.प्रीति दोङ

२५.कान्छी दोङ

२६.सानुकान्छी दोङ

२७.वाङ्ची लामा दोङ

२८.धनमाया तामाङ दोङ

२९.रेनिस दोङ

३०.मेकमाया दोङ

३१.मिलन दोङ

३२.विमला दोङ

३३.माइला पराङ

३४.प्रकाश दोङ

३५.साइली दोङ

३६.आयुश दोङ

३७.सुवास तामाङ

३८.टीकामाई दोङ

प्रकाशित : श्रावण ३०, २०७७ १४:१०
पूरा पढ्नुहोस्
प्रतिक्रिया
पठाउनुहोस्
×