लन्डन — हरेक रात स्टेजमा उक्लिनुअघि जापानी पप ग्रुप ‘एक्सजी’ का सात सदस्यहरू एउटा गोलो घेरा बनाउँछन्, एकअर्काको हात समात्छन् र ग्रुप लिडर जुरिनको नेतृत्वमा एउटा विशेष नारा लगाउँछन्– ‘हेसोनो’ । बाँकी सदस्यहरूले पनि जोडले आकाशतर्फ हात फैलाउँदै ‘ओह्’ भनेर जवाफ फर्काउँछन् ।

यो एउटा ‘होस्टे–हैंसे’ भने जस्तै जापानी प्राचीन परम्पराको मन्त्र हो । यसको पछाडि एउटा गहिरो र भावनात्मक अर्थ लुकेको छ । जापानी भाषामा ‘हेसोनो–ओ’ को अर्थ ‘नाभी’ हुन्छ, जसले कसैको जन्मदेखिको भाग्य वा अटुट सम्बन्धलाई लाक्षणिकरूपमा बुझाउँछ ।

समूहकी सबैभन्दा सुरुवाती सदस्य चिसाका अनुसार, उनीहरू सुरुदेखि नै एकअर्कासँग वैचारिक र भावनात्मक हिसाबले घनिष्ठ छन् । ‘हामीबीच अगाध सम्बन्ध छ, सबैको समान धारणा छ’ चिसाले भनिन्, ‘एउटा आमा र शिशुको जस्तै हामी पनि वास्तवमै एउटै नाभीले जोडिन पाए हुन्थ्यो भनेर म सुरुवाती दिनदेखि नै कल्पिन्थें ।’

लन्डनको प्रतिष्ठित वेम्बली स्टेडियममा ६ जुनमा भएको ‘क्यापिटल्स समरटाइम बल’ मा भव्य प्रस्तुति दिएको भोलीपल्ट बीबीसीसँग कुरा गर्दै यस ग्रुपका सदस्यहरूले आफ्नो संघर्ष र सफलताको कथा सुनाएका थिए ।

‘बाँच्नका लागि गरिएको संघर्ष’

सन् २०१६ मा जापानभरिका हजारौं आकांक्षीहरूमध्येबाट यो ग्रुपका सदस्यहरू छानिएका थिए । छानिएका २१ जना प्रशिक्षार्थीलाई एउटै होस्टेलमा राखेर बिहानदेखि बेलुकासम्म गायन, नृत्य र विभिन्न कठोर तालिम दिइन्थ्यो । यो तालिम कतिसम्म कडा थियो भने, होस्टेलको तस्बिर सामाजिक सञ्जालमा हाल्दा पनि उनीहरूले ठुलो गाली खान्थे । कतिपय अवस्थामा बिरामी नहुन्जेल वा नरुँदासम्म ‘स्क्वाट्स’ (एक प्रकारको शारीरिक व्यायाम) मा लगाइन्थ्यो ।

‘एक्सजी’ की सदस्य मायाका अनुसार, त्यो उनको जीवनकै सबैभन्दा कठिन र मानसिक तथा शारीरिक संघर्षको कष्टकर दिन थियो । चिसाले त्यस अवधिलाई ‘बाँच्नका लागि गरिएको विशुद्ध संघर्ष’ को रूपमा सम्झन्छिन् । तर, यही कठिन समयले उनीहरूलाई व्यावसायिक प्रतिस्पर्धी मात्र बनाएन, बरु एउटा पारिवारिक सम्बन्ध जस्तै भएको ‘एक्सजी’ म्युजिकल ब्यान्डमा एकाकार गरायो ।

सांगीतिक सफलता र विश्वमञ्चमा उदय

यो जापानी पप ब्यान्डको गठन निकै चाखलाग्दो छ। यो पूर्ण रूपमा जापानी सदस्यहरू भएको समूह भए तापनि यसको निर्माण, प्रशिक्षण र सञ्चालन दक्षिण कोरियाली पप (के-पप) शैलीमा भएको हो। यसको स्थापना जापानको ठूलो मनोरञ्जन कम्पनी एभेक्सको भगिनी संस्था एक्सजीएएलएक्सले गरेको थियो।

पूर्व के-पप आइडलसमेत रहेका कोरियोग्राफर तथा संगीतकार ज्याकोप्स (सिमोन साकाई) ले विश्वव्यापी स्टेजमा तहल्का मच्चाउने खालको एउटा ग्लोबल गर्ल ग्रुप बनाउने प्रोजेक्टको अवधारणा ल्याए । त्यसपछि सन् २०१७ देखि नै यस ग्रुपका लागि गोप्य रूपमा अडिसन र छनोट प्रक्रिया सुरु भएको थियो।

छानिएका जापानी बालिकाहरूलाई दक्षिण कोरिया र जापानमा राखेर ५ वर्षसम्म अत्यधिक कडा प्रशिक्षण दिइयो। उनीहरूलाई गायन, र्‍याप र विशेष गरी नृत्यमा पोख्त बनाइयो। एक्सजीएएलएक्स प्रोजेक्ट अन्तर्गत ती प्रशिक्षार्थीहरूको संघर्ष र प्रशिक्षणको यात्रालाई डकुमेन्ट्री सिरिज ‘एक्स्ट्रा एक्स्ट्रा’ मा समेटिएको छ । जून डकुमेन्ट्रीले आजको स्थानसम्म आइपुग्न उनीहरूले कति मेहनत गरेका थिए भन्ने कुरा देखाउँछ।

फलस्वरूप लामो प्रशिक्षणबाट ब्यान्डका लागि छानिएका उत्कृष्ट ७ सदस्यहरू जुरीन, चिसा, हिनाता, हार्वे, जुरिया, माया र कोकोना मार्च २०२२ मा गीतसहित सार्वजनिक हुनुअघि नै चर्चित भईसकेका थिए । जसले उनीहरूलाई छोटो समयमै अन्तर्राष्ट्रिय पहिचान दिलायो।

एक्सजी जापानी प्रतिभा र कोरियन पप ट्रेनिङको उत्कृष्ट समिश्रणबाट बनेको एक आधुनिक ग्लोबल पप ब्यान्ड हो। उनीहरूका गीतहरू मुख्यतया अंग्रेजी भाषामा हुन्छन् । जसले गर्दा उनिहरूलाई विश्वभरका दर्शकमाझ चर्चित हुन मद्दत गरेको छ ।

पाँच वर्षको कठोर तालिमपछि, १८ मार्च २०२२ मा ‘एक्सजी’ ले आफ्नो पहिलो सिंगल ट्रयाक ‘टिप्पी टोज’ ल्यायो । हिप–हप र आर एन्ड बीको उत्कृष्ट संयोजन रहेको यस गीतले निकै छिटो विश्वका संगीतप्रेमीको ध्यान खिच्यो । पछि ‘गल्ज साइफर’ र ‘सुटिंग स्टार’ जस्ता गीतहरू टिकटक र युट्युबमा निकै भाइरल भए ।

सन् २०२५ मा अमेरिकाको प्रतिष्ठित सांगीतिक महोत्सव ‘कोचेला’ मा प्रस्तुति दिने ‘एक्सजी’ एक मात्र जापानी ब्यान्ड थियो । यो ब्यान्डको गायन शैलीलाई चल्तीको ‘के–पप’ वा ‘जे–पप’ भन्दा पनि फरक पहिचानमा ‘एक्स–पप’ भन्न थालिएको छ ।

कोकोनाको साहस र ग्रुपको नयाँ पहिचान

गत डिसेम्बरमा आफ्नो २०औं जन्मदिनको अवसरमा ग्रुपकी सबैभन्दा कान्छी सदस्य कोकोनाले सामाजिक सञ्जाल इन्स्टाग्राममार्फत आफू ‘ट्रान्समास्कुलिन’ र ‘नन–बाइनरी’ भएको घोषणा गरिन् । कडा नियम र अनुशासन हुने ‘जे–पप’ मा यस्तो घोषणा चानचुने आँटले सकिंदैन ।

तर, कोकोनाको यो निर्णयमा ब्यान्डका बाँकी ६ सदस्यले पनि पूर्ण समर्थन र माया दिए । घोषणाका लागि खिचिएका तस्बिरहरू ग्रुप लिडर जुरिनले खिचेकी थिइन् भने चिसाले उनको मेकअप गरेकी थिइन् । प्रशंसकहरूबाट पनि कोकोनाले ठुलो साथ र स्वीकार्यता पाइन् ।

यस घटनापछि ग्रुपले आफ्नो नामको अर्थ नै परिवर्तन गर्‍यो । पहिले ‘एक्सजी’ को अर्थ ‘एक्स्ट्राअर्डिनरी गर्ल्स’ अर्थात् असाधारण युवतीहरू भन्ने हुन्थ्यो भने अब यसको अर्थ ‘एक्स्ट्राअर्डिनरी जीन्स’ अर्थात्, असाधारण वंशाणुहरू राखिएको छ । यसले ‘तपाई जस्तो हुनुहुन्छ, त्यस्तै रूपमा आफूलाई स्विकार्नुपर्छ र समाजका पुराना सोचहरूलाई तोड्नुपर्छ’ भन्ने बलियो सन्देश दिन्छ ।

नयाँ एल्बम ‘द कोर’ सँगै वर्ल्ड टूर