काठमाडौँ — 'एक्सट्रिम इनर्जी रेडियो कान्तिपुर नेशनल म्युजिक अवार्ड-२०८२' को ८औं संस्करण आगामी असार २६ गते शुक्रबार आयोजना हुने भएको छ । 

कार्यक्रम ललितपुरको पुल्चोकस्थित द प्लाजामा हुनेछ रेडियो कान्तिपुरले मंगलबार काठमाडौंमा एक पत्रकार सम्मेलनमार्फत जानकारी गराएको छ । 

यसपटक कार्यक्रममा मुख्य प्रायोजकको रूपमा एक्स्ट्रिम इनर्जी ड्रिंक रहेको छ । रेडियो कान्तिपुरले आफ्नो २८औँ वार्षिकोत्सवको अवसरमा यो अवार्ड कार्यक्रम गर्न लागेको हो। 

कार्यक्रम सांगीतिक महोत्सवको रूपमा रहने जनाइएको छ । यसपटक कार्यक्रममा सयभन्दा बढी कलाकारहरू सहभागी हुनेछन् । कान्तिपुर पब्लिकेसनका चिफ मार्केटिङ अफिसर सागर केसीले यो अवार्ड नेपाली संगीत उद्योगको साझा थलो भएको उल्लेख गरे । उनले यसलाई समग्र नेपाली संगीतकै उत्थान गर्ने इभेन्टको रूपमा लिन सञ्चारकर्मीहरूलाई आग्रह गरे ।

कान्तिपुर मिडिया ग्रुपकी कर्पोरेट म्यानेजर सिम्रन श्रेष्ठका अनुसार यस वर्ष कुल १४ सांगीतिक विधामा अवार्ड दिइनेछ । अवार्डका विधाहरूमा उत्कृष्ट नव गायक/गायिका, रचनाकार, संगीत निर्देशक, लोकदोहोरी, पार्श्व गायन, पप, सांगीतिक समूह, हिपहप/आर एन्ड बी र आधुनिक विधा छन् । 

विसं २०८२ वैशाख १ देखि  चैत मसान्तसम्म सार्वजनिक भएका नेपाली गीतहरूमध्येबाट उत्कृष्ट ५ को मनोनयन गरिएको हो । यसका लागि तीन सदस्यीय जुरी गठन गरिएको थियो ।

संगीतमा लामो समय योगदान दिने एक विशिष्ट व्यक्तित्वलाई १ लाख रुपैयाँ राशिको 'लाइफ टाइम अचिभमेन्ट अवार्ड' प्रदान गरिनेछ । श्रोताहरूले ई-सेवामार्फत भोट गरेर छनोट गर्ने 'पिपुल्स च्वाइस अवार्ड' को विधा पनि यसमा समावेश छ । यस वर्ष 'एक्स्ट्रिम एनर्जेटिक पफर्मर अफ द इयर' अवार्ड पनि विशेष आकर्षणको रूपमा रहनेछ ।