काठमाडौँ — काठमाडौँ अन्तर्राष्ट्रिय पर्वतीय चलचित्र महोत्सव (किम्फ) को २३औँ संस्करण बुधबारदेखि ठमेलस्थित क्यूएफएक्स छायाँ सेन्टरमा सुरू भएको छ ।

निर्देशक त्रिवेनी राईको अन्तर्राष्ट्रिय रूपमा प्रशंसित डेब्यु फिचर चलचित्र ‘शेप अफ मोमो’ को नेपाल प्रिमियरसँगै ५ दिने महोत्सवको औपचारिक उद्घाटन गरिएको हो ।

संस्कृति, पर्यटन तथा नागरिक उड्डयनमन्त्री खडकराज पौडेलले महोत्सवको शुभारम्भ गर्दै चलचित्रका माध्यमबाट गरिने कथावाचन र मौलिक कथाहरूको उत्सव मनाउनु नेपाली संस्कृतिको अभिन्न अङ्ग भएको बताए ।

उद्घाटन समारोहमा निर्देशक राईले ‘शेप अफ मोमो’ जस्तो नितान्त व्यक्तिगत कथालाई पर्दामा उतार्न लागेको अनुभव सुनाउँदै किम्फ जस्ता मञ्चहरू नयाँ चलचित्रकर्मीहरूका लागि महत्त्वपूर्ण प्रस्थानबिन्दु बन्ने उल्लेख गरिन् । त्यस्तै, चलचित्र ‘एलिफेन्ट्स इन द फग’का निर्देशक अविनाशविक्रम शाहले किम्फबाटै आफ्नो यात्रा सुरु भएको स्मरण गर्दै चलचित्रमा दृश्य पछाडिको वास्तविक अर्थ पहिल्याउनुको महत्त्वमाथि बताए ।

जेठ १७ गतेसम्म चल्ने यस वर्षको महोत्सवमा २९ देशका ५० भन्दा बढी फिक्सन, डकुमेन्ट्री, सर्ट फिल्म र एड्भेन्चर विधाका चलचित्रहरू प्रदर्शन गरिँदै छन् ।