कान्स, फ्रान्स — रोमानियाली निर्देशक क्रिस्चियन मुन्जियुको नर्वे–केन्द्रित राजनीतिक ध्रुवीकरणसम्बन्धी फिल्म ‘फियोर्ड’ ले ७९ औं क्यान्स फिल्म फेस्टिभलको सर्वोच्च पुरस्कार पाल्मे डी’ओर जितेको छ । यो मुन्जियुको दोस्रो पाल्मे डी’ओर हो । दोहोरो पाल्मे डी’ओर जित्ने उनी दशौं निर्देशक पनि भएका छन् । यसअघि उनको फिल्म ‘फोर मन्थस्, थ्री विक्स एन्ड टू डेज’ का लागि सन् २००७ मा यो पुरस्कार जितेका थिए । त्यसैगरी, उनकै फिल्म ‘वियोन्ड द हिल्स’ ले सन् २०१२ मा उत्कृष्ट पटकथा र ‘ग्र्याजुएसन’ ले सन् २०१६ मा उत्कृष्ट निर्देशकको कान्स जितेका थिए ।

शनिबार साँझ सम्पन्न कान्स समारोहमा ‘फियोर्ड’ ले व्यापक प्रशंसा पायो । यस फिल्ममा सेबास्टियन स्टान र रेनाते रेनस्भे मुख्य भूमिकामा छन् । यस फिल्मले रोमानियाबाट नर्वे बसाइँ सरेको एक दम्पत्तीको कथा भन्छ । जसमा आफ्ना बच्चालाई ‘पिटेको’ आरोप लागेपछि नर्वेको बाल सेवा कार्यालयले ती दम्पतीलाई सन्तानबाट अलग गरिदिन्छ । निर्देशक मुन्जियुले फिल्मलाई ‘कट्ट वामपन्थी’ को अवधारणामा भनेको यस कथालाई कान्समा निकै रुचाइयो ।

‘आज समाज विभाजित छ, ध्रुवीकृत छ, कट्टर बन्दै गईरहेको छ’ पाल्मे डी’ओर अवार्ड थापेपछि निर्देशक मुन्जियुले भने, ‘यो फिल्म कुनै पनि प्रकारको रुढीवादविरुद्धको प्रतिज्ञा हो । यो हामीले बारम्बार भन्दै आएका ट्रमा, समावेशीकरण र समानुभूति जस्ता कुराहरुप्रतिको प्रतिज्ञा पनि हो । यी प्रीय शब्दहरूलाई हामीले व्यवहारमा बढी भन्दा बढी लागू गर्नु जरुरी छ ।’

‘फियोर्ड’ को जितले कान्समा तरंग उत्पन्न गर्न थप मद्दत गरिदिएको छ । जबकी ‘द गार्डियन’ मा समीक्षक पिटर ब्राडश ले यस फिल्मलाई मात्र दुई स्टार दिएका थिए । पछिल्लो समय कान्समा लगातार विषयप्रधान फिल्मले आधिपत्य जमाउँदै आएका छन् । त्यसमा पनि अमेरिकन वितरक तथा इन्डिपेन्डेन्ट फिल्म प्रोडक्सन कम्पनी नियोनले ‘फियोर्ड’ सहित कान्समा लगातार सातौं पाल्मे डी’ओर जितको किर्तिमान पनि बनाएको छ । गत वर्ष जाफर पनाहीको ‘इट वाज जस्ट एन् एक्सिडेन्ट’ र सन् २०२४ को विजेता ‘एनोरा’ पनि नियोनकै फिल्म थिए । ‘एनोरा’ ले पछि अस्कारमा पनि उत्कृष्ट फिल्म बनेको थियो ।

त्यसैगरी, दोस्रो स्थानको ‘ग्रान्ड प्रिक्स’ रुसी निर्देशक आन्द्रे ज्भ्यागिन्तसेभको फिल्म ‘मिनोटउर’ ले जितेको छ । क्लाउड चाब्रोलको पुरानो फिल्म ‘द अनफेथफुल वाइफ’ बाट प्रेरित यो फिल्म रुस–युक्रेन युद्धको पृष्ठभूमिमा थ्रीलर जनरामा आधारित छ । फिल्ममा एक रुसी व्यापारी जो आफ्नी श्रीमतीको आफ्नै एक मजदुरसँग अनैतिक सम्बन्ध भएकोमा शंका सँगसँगै रुसी राष्ट्रपति भ्लादिमिर पुटिनको युद्धमा आफ्ना एक सय ५० मजदुर पठाउनुपर्ने जिम्मेवारीबीचको कथा छ । ज्भ्यागिन्तसेभले भने, ‘यो नरसंहार रोक्न सक्ने एक मात्र व्यक्ति तपाईं रुसी राष्ट्रपति हो, यसलाई अन्त्य गर्नुहोस् । सम्पूर्ण विश्व तपाईंको यो कदमको प्रतीक्षा गरिरहेको छ ।’