काठमाडौँ — पहिलो एल्बम ‘हङओभर’ रिलिजको दुई वर्ष पनि नबित्दै गायिका एला ल्याङ्लीले ‘कन्ट्री म्युजिक’ मा तहल्का मच्चाएकी छन् । सन् २०२४ मा सिंगल ट्रयाक ‘यु लुक लाईक यु लभ मी’ बाटै चार वटा एकेडेमी अफ कन्ट्री म्युजिक (एसीएम) अवार्ड जितेकी ल्याङ्लीले यस वर्ष पनि एसीएम अवार्डमा पाँचवटा अवार्ड जित्दै आफ्नो वर्चश्व कायम राखेकी छन् ।

आईतबार राती लास भेगासमा सम्पन्न एसीएम अवार्डमा ल्याङ्लीको क्रसओभर हिट ‘चुजि‌ंग टेक्सास’ यसवर्षको ‘सङ अफ द इयर’ बनेको छ । ‘मसँग कुनै शब्द नै छैन, मेरा फ्यानहरूलाई धन्यवाद,’ अवार्ड जितेपछि मन्तव्यका क्रममा ल्याङ्लीले भनिन्, ‘मलाई थाहा छैन, तपाईहरू यस गीतप्रति किन यतिधेरै आशक्त हुनुहुन्छ ? तैपनि यसरी मन पराईदिनु भएकामा सबैलाई धन्यवाद ।’

२७ वर्षिया गायिका तथा गीतकार ल्याङ्ली आईतबार साँझ एसीएम अवार्डमा सर्वाधिक व्यस्त रहिन् । वर्षकै उत्कृष्ट गीत घोषणा भएको आधा घन्टा नबित्दै ‘चुजि‌ंग टेक्सास’ ले ‘सिंगल अफ द इयर’ को अवार्ड पनि जित्यो । साथै, वर्षको उत्कृष्ट गायिकाको उपाधीसमेत जित्न सफल भएकी ल्याङ्लीले रिले ग्रीनसँगको युगल गीत ‘डन्ट माइन्ड इफ आई डू’ का लागि समेत वर्षको उत्कृष्ट म्युजिक इभेन्टको अवार्ड हात पारिन् । अवार्ड लिन पटक पटक स्टेज चढेकी गायिकाले चौथो अवार्ड जितिसकेपछिको खुशीमा भावुक हुँदै भनिन्, ‘म हरेक पटक केही भन्न खोज्छु, तर सकिरहेकी छैन । यदि मलाई यति धेरै महिलाहरूको प्रोत्साहन हुँदैनथ्यो भने यहाँ यसरी उभिएकी हुने थिइनँ ।’