सुर्खेत — अभिनेता राजेश हमालले आफू अब निर्देशनको यात्रामा अघि बढ्ने बताएका छन् । पछिल्लो समय सिनेमा हेर्ने दुष्टिकोण, कथा, प्रस्तुति शैली, माध्यम र संस्कृति बदलिएकाले आफूलाई निर्देशनको यात्रामा जाने सोच आएको उनले बताए । ‘मैले निर्देशन गरे कथावस्तु मौलिक र प्रस्तुति आधुनिक हुनेछ,’ उनले भने, ‘त्यसमा मैले अभिनय गरेको भन्दा फरक कथावस्तु र चरित्र देखाउन मन छ ।’ 

वीरेन्द्रनगरमा जारी कर्णाली उत्सवको सातौं संस्करणको तेस्रो दिन ‘नखिचिएको सिनेमा’ मा बोल्दै अभिनेता हमालले नेपाली सिनेमाका कथा उही भए पनि प्रस्तुति शैली फरक भइरहेको सुनाए । ‘कुनै बेला नयाँ सिनेमा चल्दा उत्सवजस्तै हुन्थ्यो, धेरैजसो दर्शक यस्तो सिनेमा कसरी बन्यो भन्दै महिनौंसम्म बहस गर्थे,’ उनले भने, ‘अहिले सबैको हातमा चलचित्र छ, व्यक्तिले कुनै न कुनै हिसाबले चलचित्र बनाइरहेको छ, पहिले कलाकारले मात्र फिल्म खेल्थे, अहिले टिकटकमार्फत सबैले अभिनय गरिरहेका छन् ।’ अब सिनेमा हलभित्र जाँदा आममानिसले गर्ने अभिनयभन्दा फरक हुनुपर्ने उनले बताए ।  

अभिनय गर्दा कलाकार जतिसक्दो पात्रको चरित्रको गहिराइभित्र डुब्नुपर्ने हमाल बताउँछन् । पहिलेको सिनेमामा रहनसहन, लवाइखुवाइ र जीवनशैली पर्दामा जस्ताको तस्तै उतारिने भए पनि अहिले जीवनशैलीलाई सामान्य बनाउन थालिएको उनले गुनासो गरे । ‘त्यो बेलाको सिनेमामा जनजीवन र पर्दाबीच गहिरो सम्बन्ध हुन्थ्यो, गीत, अभिनय, द्वन्द्व सबैबाट फरक सन्देश प्रवाह हुन्थ्यो,’ उनले भने, ‘अहिले मनोरञ्जन मात्र प्रवाह भएको छ, प्राय: नयाँ चलचित्रमा सन्देश भेटिँर्दैनन् ।’   

आफू सहरमा हुर्किए पनि अधिकांश सिनेमा गाउँले परिवेश र पात्रमा खिचिएकाले धेरै दर्शकले आफूसँग आत्मीयता देखाउने गरेको हमालले बताए । ‘मेरा धेरै चलचित्र आमजनजीवन बिताइरहेका पात्रहरूकै भूमिकामा थिए, चलचित्रका नाम पनि आमनेपालीलाई प्रतिनिधित्व गर्ने हुन्थे,’ उनले भने, ‘मैले अभिनय नगरेका पेसा र व्यवसाय सायदै होलान्, अभिनय गर्दा उनीहरूको जीवनशैली, बोलीचाली, भाषा, संघर्ष, खानपान सबैसँग म परिचित छु, जसले मलाई दर्शकसँग नजिक बनायो ।’ कलाकारको महत्त्वपूर्ण औजार नै अरूको दृष्टिकोणबाट आफूलाई हेर्ने र बुझ्ने क्षमता भएको उनको भनाइ छ ।