काठमाडौँ — इरानको ‘माइ डटर हेयर’ फिल्म देखाउँदै काठमाडौंमा नेपाल अन्तर्राष्ट्रिय फिल्म महोत्सव (निफ)को ९औं सँस्करण सुरु भएको छ । 

आज सुरु भएको महोत्सव ५ दिनसम्म आयोजना हुनेछ । ४० देशबाट छानिएका ८८ फिल्म महोत्सवमा देखाइँदैछ । महोत्सवमा १० वटा अन्तर्क्रियात्मक कार्यक्रम पनि गरिनेछ । 

महोत्सवको उद्घाटन कार्यक्रममा भारतीय निर्देशक रमेश सिप्पीलगायत धेरै देशलाई प्रतिनिधि गर्ने अतिथि उपस्थित थिए । उपस्थित दर्शक र अतिथिलाई स्वागत गर्दै अध्यक्ष केपी पाठकले युद्धले निम्त्याएको विषम परिस्थितिबीच कति पाहुना  नेपाल आउन नसकेको जनाए ।  ‘अन्तर्राष्ट्रिय रुपमा जुन समस्याका कारण हवाई उडान सकेको छैन,  हाम्रा कति पाहुना यही कारणले पनि महोत्सवमा आउन सक्नु भएन । तर, जसले यो समस्याका बीच पनि यहाँसम्म आइदिनु भयो, यहाँहरुलाई स्वागत छ,’ अध्यक्ष पाठकले भने ।