काठमाडौँ — नेपाली सुगम संगीतका सर्जक दीपक खरेलको पहिलो बृहत् अर्केस्ट्रासहितको एकल साँझ 'इकोज अफ इटरनिटी' चैत्र २७ गते नेपाल प्रज्ञा प्रतिष्ठानमा आयोजना हुने भएको छ ।

कार्यक्रममा खरेलले आफ्ना कालजयी ‘पूर्णिमाको रात पनि’, ‘तिम्रो त्यो हँसिलो मुहारको’, ‘यो कर्मभूमीको आँगनमा’, ‘प्रतीक्षा गर मेरी मायालु’, ‘बादल बनाइदेऊ’, ‘गरूँ कि मिठो भूल’ र ‘बिहानीको सिरेटोमा’सहित १७ गीत प्रस्तुत गर्नेछन् ।

यस विशेष सांगीतिक साँझमा नर्वेका ४ जना कलाकारसहित ५२ वाद्यवादक तथा १६ जना युवा तथा बालबालिकाको कोरस प्रस्तुति रहने आयोजक संस्था सुधाकर भ्वाइलिन स्कुलले जनाएको छ । कार्यक्रममा ११ वर्षदेखि ७० वर्ष उमेर समूहका संगीतकर्मीको सहभागिता रहने र यसले संगीतको तीन पुस्ताबीचको सांगीतिक सेतु निर्माण गर्ने आयोजकको भनाइ छ ।

'नेपाली सुगम संगीत रुचाउनेहरूका लागि यो कार्यक्रमबाट अविस्मरणीय अनुभव दिनका लागि तयारी गरिरहेको छु । यस खालको अर्केस्ट्रासहितको कार्यक्रमले श्रोताहरूलाई एउटा फरक अनुभव दिनेछ,' गायक खरेलले भने ।

कार्यक्रमका परिकल्पनाकार सुधाकर वस्तीका अनुसार 'इकोज अफ इटरनिटी' खरेलका कालजयी गीतहरूको संरक्षण तथा नयाँ पुस्तामा हस्तान्तरण गर्ने उद्देश्यले आयोजना गरिएको हो । 'नेपाली संगीतप्रेमीका लागि एक ऐतिहासिक सांगीतिक अनुभव दिनका लागि बृहत् आर्केस्ट्रासहित कार्यक्रम आयोजन गर्न लागिएको हो,' उनले भने ।

कार्यक्रमका लागि सहयोगी संस्थाकाका रुपमा  काठमाडौं प्रज्ञा कुञ्ज स्कुल र अन्नपूर्ण स्कुल अफ अर्केस्ट्रा रहेका छन् । कार्यक्रमको टिकट खल्ती एपमा उपलब्ध हुने आयोजकले जानकारी गराएको छ ।