दर्शकहरूले पहिलो फिल्ममा सेतुपति र अनुराग कश्यपको अभिनय मन पराएपछि दुवैलाई पुनः एकसाथ पर्दामा देख्न चाहेका छन् ।
काठमाडौँ — दक्षिण भारतीय अभिनेता विजय सेतुपतिको क्रेज भारतमात्र नभई नेपालमा पनि उत्तिकै छ ।
फिल्म प्रदर्शनअघि नै दर्शकमाझ चर्चामा रहने सेतुपतिका फिल्महरूले बक्स अफिसमा मात्र नभई ओटिटी प्लेटफर्ममा पनि राम्रो प्रतिक्रिया पाउने गरेका छन् ।
सन् २०२४ मा रिलिज भएको उनको फिल्म ‘महाराजा’ले बक्स अफिसमा गरेको कीर्तिमानी कमाइले धेरैलाई चकित पारेको थियो ।
यसैबीच, ‘महाराजा’ को सिक्वेल निर्माण हुने चर्चा चुलिएको छ । यसै सन्दर्भमा सेतुपतिले हालै एक अन्तर्वार्तामा फिल्मको स्क्रिप्टबारे खुलासा गरेका छन् ।
भारतीय सञ्चारमाध्यमहरूसँगको कुराकानीमा विजय सेतुपतिले भने, ‘निर्देशक निथिलान सामीनाथनले ‘महाराजा २’ को स्क्रिप्ट तयार गरिसक्नुभएको छ । म यो सुन्नका लागि निकै उत्साहित छु ।’
यो भनाइले उनी फिल्ममा रहने सम्भावनालाई बलियो बनाएको छ । यद्यपि, पहिलो भागमा सेतुपतिसँगै मुख्य भूमिकामा देखिएका अनुराग कश्यपको उपस्थितिबारे भने हालसम्म केही खुलाइएको छैन ।
‘महाराजा’ को पहिलो भागमा उनीहरूको अभिनयले दर्शकको मन जितेको थियो । त्यसैले प्रशंसकहरू यी दुईको जोडी फेरि पर्दामा देख्न आतुर छन्।
करिब ३० करोडको बजेटमा बनेको ‘महाराजा’ ले विश्वभर १ सय ९० करोडभन्दा बढीको व्यापार गरेको थियो ।
